Í stríð við Varnarliðið

"Það lítur út fyrir að skrifstofurnar hér breytist í málflutningsstofu á næstu dögum," segir Kristján Gunnarsson, formaður Verkalýðs- og sjómannafélags Keflavíkur og nágrennis. Til hans koma daglega félagsmenn sem starfa fyrir varnarliðið á Keflavíkurflugvelli og kvarta undan kjarasamningsbrotum og hefur félagið sent utanríkisráðherra einar 14 stefnur undanfarnar vikur vegna málsins. Kristján segir að verið sé að undirbúa tugi lögsókna vegna málsins enda sýni varnarliðið engan samstarfsvilja. "Það eru nú liðin tvö ár síðan varnarliðið ákvað að fara ekki eftir kjarasamningum sem í þessu landi gilda. Starfsfólk er mjög eðlilega orðið reitt og fúlt þar sem það nýtur ekki sömu kjara og allir aðrir landsmenn og verða af þúsundum króna í hverjum mánuði." Kristján segir að engir séu undanskildir hvað þetta varðar. Allir hópar sem á Keflavíkurflugvelli starfi hafi orðið af sjálfsögðum kjarabótum. "Það liggur við að við sendum utanríkisráðherra stefnur í hverri viku enda er ekki hægt að eiga viðræður beint við varnarliðið. Slíkt þarf að fara gegnum utanríkisráðuneytið og svokallaða kaupskrárnefnd sem starfar í umboði ráðuneytisins. Ég sé fram á málarekstur fyrir allt að 150 félagsmenn á næstu dögum og vikum." Eina hlutverk kaupskrárnefndar er að sjá til þess að þeir starfsmenn varnarliðsins eða erlendra verktaka þess á varnarsvæðum sem lúta íslenskum lögum, fái kaup og kjör og njóti þess öryggis og aðbúnaðar á vinnustað sem íslensk lög, kjarasamningar og venjur segja til um á hverjum tíma. Utanríkisráðuneytið og lögfræðingar þess hafa viðurkennt að varnarliðinu beri að virða íslenska kjarasamninga að fullu og tekið undir kröfur verkalýðsfélagsins en að hnífurinn standi á varnarliðinu. Forsvarsmenn þess segja hendur sínar bundnar í málinu enda verði allar aukafjárveitingar að fara í gegnum bandaríska þingið og hljóta samþykki þar.