Athugasemdir við flest skólaeldhús

Athugasemdir voru gerðar við tuttugu og þrjú eldhús af þrjátíu og fjórum í grunnskólum Reykjavíkur. Þetta kemur fram í úttekt á starfsemi eldhúsa í grunnskólum Reykjavíkur sem unnin var fyrir Fræðslumiðstöð Reykjavíkur. Guðrún Ebba Ólafsdóttir, fulltrúi Sjálfstæðisflokks í fræðsluráði, segist telja nauðsynlegt að ráðist verði í úrbætur á starfsemi eldhúsanna sem allra fyrst þar sem ljóst sé að staða þessara mála sé ekki nægilega góð í borginni. Stefán Jón Hafstein, formaður fræðsluráðs Reykjavíkur, segir að langflest börn fái heitan mat í grunnskólum borgarinnar og að Reykjavíkurlistinn hafi viljað drífa af uppbyggingu skólaeldhúsa. "Okkur grunaði að það mætti bæta margt í rekstri þeirra og þess vegna létum við gera skýrsluna og nú vitum við hvaða skref þarf að stíga næst." Í engu eldhúsanna reyndist hægt að rekja uppruna matvara á pappír eða í tölvum heldur eingöngu eftir minni starfsmanna. Það er ófullnægjandi og óæskilegt. Þá segir að mikilvægt sé að mynda pólitíska stefnu um manneldismál í eldhúsunum því annars sé erfitt að uppfylla ströngustu kröfur um hollustu og heilbrigði. Koma þurfi á faglegum vinnubrögðum í eldhúsunum með innra eftirliti, gæðahandbók, hitastigsmælingum og næringarútreikningum. Þetta þurfi að koma til framkvæmda svo tryggja megi öryggi þeirra sex þúsund og fimm hundruð nemenda og starfsmanna sem borði hádegismat í grunnskólum Reykjavíkurborgar. Stefán segir að nú verði gerðir staðlar fyrir öll eldhúsin með gátlistum um búnað og eldunaraðferðir. Þá verði tryggt að rekja megi uppruna vörunnar ef veikindi koma upp og í framhaldinu verði gerðir viðmiðunarmatseðlar sem mötuneytin geti nýtt sér til að hollustu- og kostnaðargreina máltíðir. Auk þess verður hagkvæmni leitað í innkaupum með útboðum.