Samruninn úti

Samruni Sölumiðstöðvar hraðfrystihúsanna, SH og Sölusambands íslenskra fiskframleliðenda, SÍF er endanlega úr sögunni eftir að SÍF ákvað um helgina að kaupa stórt franskt matvælafyrirtæki og selja um leið rúmlega 22% hlut sinn í SH. Í ársbyrjun í fyrra var það vilji bæði Landsbankans og Íslandsbanka að félögin yrðu sameinuð, en ekki náðist samkomulag um mat á fyrirtækjunum við þann samruna og heldur ekki þegar láitð var á það reyna síðar á árinu. SÍF hafði á meðan eignast rúmlega 23 prósenta hlut í SH, sem félagið ætlar nú að selja, en fyrir hádegi lá ekki fyrir hver kaupandinn yrði. SÍF hefur ákveðið að kaupa franska matvælafyrirtækið Laberí fyrir 29 milljarða króna, sem er þrefalt andvirði móðurfélagsins SÍF. Þá ætlar SÍF að selja Iceland seafood í Bandaríkjunum, sem upphaflega var Sjávarafurðadeild Sambandsins og hét síðan Íslenskar sjávarafurðir, eða þar til fyrirtækið var sameinað SÍF. Þar með hættir SÍF allri starfssemi sinni í Bandaríkjunum en fyrirtækið Sjóvík kaupir Iceland Seafood fyrir 4,8 milljarða króna. Það er 12 áraa gamalt íslenskt fyrirtæki sem rekur fimm fiksiðjuver í Asíu og eitt í bandaríkjunum, sem það fékk í kaupunum. Þá gerir sjóvík út þrjá línubáta frá Rússlandi og á tíu þúsund tonna kvóta þar. Aðaleigandi Sjóvíkur er Sund hf, sem er í eigu ekkju Óla í Olís og afkomenda hans. Útrás SÍF á Frakklandsmarkað þar sem fiskur er ekki lengur aðalatriðið, minnir nokkuð á fyrri útrás Bakkavarar á Bretlandsmarkaði. En annars er það að frétta af Bakkavör að fjármálasérfræðingar telja æ sterkari líkur á að Bakkavör geri yfirtökutilboð í matvælafyrirtækið Geest í Bretlandi , sem er mjög stórt á sínu sviði. Bakkavör á nú þegar 20 prósent í félaginu og hefur að undanförnu verið að safna auknu hlutafé og gera aðrar ráðstafanir sem talið er að tengist yfirtökunni beint.