Ár fjölmiðlafrumvarpsins

Jafnvel þótt skattar hafi verið lækkaðir, borgarstjóri sagt af sér, íslensk fyrirtæki haslað sér völl á erlendri grund sem aldrei fyrr og að þjóðlífið hafi lamast vegna kennaraverkfalls voru allir viðmælendur Fréttablaðsins á einu máli um að fjölmiðlafrumvarpið stæði upp úr. Rætt var við vel á annan tug manna sem hafa að atvinnu að rýna í stjórnmál. Egill Helgason, Silfri Egils orðaði þetta svo: "Þarf að spyrja: Synjun Ólafs Ragnars á fjölmiðlalögunum. Segja það ekki allir?" Keppinautur hans um hylli áhugamanna um pólitík á sunnudögum, Guðmundur Steingrimsson á Skjá einum er sammála um að synjun Ólafs Ragnars standi upp úr: "Atburðurinn var sveipaður dramatískum blæ, eftirvænting ríkti eftir ákvörðun forsetans og þjóðin horfði á hann gefa yfirlýsinguna í beinni útsendingu." Ólafur Teitur Guðnason, stjórnmálablaðamaður Viðskiptablaðsins og liðsmaður Guðmundar á Skjá einum var á öndverðum meiði við hina tvo fyrrnefndu í málinu en sammála um stærð málsins á árinu en bætir við: "Næststærsti atburðurinn var líklega hið ótrúlega litla fylgi sem forsetinn hlaut í kosningum í kjölfarið; það var einsdæmi fyrir sitjandi forseta." Jóhanna Vigdís Hjaltadóttir, þingfréttamaður sjónarpsins, bendir á annan flöt: "Fyrir blaðamann sem ekki er í Blaðamannafélaginu, eins og ég, var líka ansi sérstakt að fylgjast með formanni þess félags beita sér opinberlega gegn þessari fyrirhuguðu lagasetningu." Flestir nefna átök þegar spurt er um hvað hafi einkennt árið. Ólafur Teitur: "Margir fréttamenn gáfu ekkert eftir í átökum við ríkisstjórnina, lögðu banana að dyrum Alþingishússins og einn frægasti fréttamaður landsins hvatti mótmælendur á Austurvelli til þess að "velta borðum valdníðinganna", eins og hann orðaði það." Pétur Gunnarsson, þaulreyndur stjórnmálablaðamaður sem nú starfar fyrir þingflokk Framsóknarflokksins segir að 2004 hafi verið eitthvert mesta átakaár í pólitíkinni frá áttunda áratugnum. Um beitingu synjunarvaldsins segir hann: "Hún setti af stað stjórnskipunarlega krísu en veitti um leið tilefni og tækifæri til þess að vinna úr málinu með því að halda áfram að þróa stjórnarskrá landsins. "