Spennandi keppni í Kína

Engu breytti þótt allt gengi á afturfótunum hjá heimsmeistaranum Michael Schumacher í Formúla 1 kappakstrinum sem fram fór í Kína í gær. Félagi hans hjá Ferrari, Rubens Barrichello, tók þá við sprotanum og sigraði eftir spennandi rimmu við þá Jenson Button og Kimi Raikkonen. Sigurinn var afar sætur og einn sá mest spennandi sem sést hefur um hríð í Formúlunni. Barrichello hélt fyrsta sætinu alla keppnina en hörð atlaga var gerð að honum alla 56 hringina. Voru þar á ferð þeir Jenson Button sem ekur fyrir BAR-Honda og Kimi Raikkonen hjá McLaren og var mjótt á mununum þegar bílarnir komu í mark eftir stanslitla 306 kílómetra. Var Button 1 sekúndu á eftir Barrichello og Raikkonen fjórum sekúndubrotum betur. Heimsmeistarinn Michael Schumacher komst aldrei í gang þrátt fyrir tilburði. Honum gekk illa í tímatökum fyrr um helgina og ekki tók betra við í keppninni sjálfri. Var hann í sextánda sæti eftir tíu hringi og lenti þá í samstuði við Klien sem ekur fyrir Jagúar. Varð Klien að hætta keppni en Schumacher hélt sínu striki og náði tólfta sætinu áður en loftlaus hjólbarði gerði honum lífið erfitt. Endaði hann þó í því sæti og náði að setja hraðasta hring í keppninni í leiðinni. Úrslitin breyta þó engu um heimsmeistaratitilinn þegar tvær keppnir eru eftir. Schumacher er langt undan öðrum keppendum og sömu sögu má segja um lið Ferrari sem leiðir keppni bílasmiða með talsverðum mun. Sagðist Schumacher eftir keppnina ánægður með sigur Barrichellos og stoltur af því að bjáti eitthvað á hjá öðrum bílstjóranum tekur hinn upp hanskann. Var um fyrstu keppni í Formúlu 1 að ræða í Kína en keppt var á glænýrri braut sem byggð var sérstaklega fyrir Formúlu kappaksturinn. Var fullsetinn bekkurinn og fengu áhorfendur aldeilis að sjá hvað gerir þessa keppi spennandi.