Rooney kláraði Svisslendinga

Wayne Rooney skoraði tvö mörk og leiddi Englendinga til 3-0 sigurs gegn Sviss í B-riðli Evrópumótsins í knattspyrnu í gær. Með mörkunum varð Rooney yngsti leikmaðurinn í sögunni til að skora mark í lokakeppni Evrópumótsins, og hefur þessi 18 ára leikmaður heldur betur slegið í gegn það sem af er Evrópumótinu. Mörkin skoraði Rooney í sitthvorum hálfleiknum, en Steven Gerrard bætti við þriðja markinu um tíu mínútum fyrir leikslok. Svisslendingar léku einum færri síðasta hálftímann eftir að Bernt Haas var vikið af velli. Sigurinn var helst of stór miðað við gang leiksins, því leikur enska liðsins var allt annað en sannfærandi. Sviss var mun betri aðilinn framan af leiknum og var það sérstaklega eftir horn- og aukaspyrnur Hakans Yakins sem hurð skall nærri hælum upp við mark enska liðsins. Algjörlega gegn gangi leiksins náði Rooney að skora á 23. mínútu og varð markið til þess að ró kom yfir leik Englendinga og þeir komust betur inn í leikinn. Leikmenn Sviss neituðu þó að gefast upp, en í kjölfarið á brottvikningu Haas varð uppgjöf í herbúðum svissneska liðsins, Englendingar gengu á lagið og skoruðu tvö mörk áður en yfir lauk. Sven-Göran Eriksson, þjálfari enska liðsins, kvaðst mjög ánægður með hvernig leikmenn sínir burgðust við tapinu gegn Frökkum um síðustu helgi. "Þegar maður tapar leik á þann hátt sem við gerðum á sunnudaginn veit maður aldrei hvernig leikmennirnir bregðast við. Ég bjóst við jákvæðri svörun og fékk hana," sagði Eriksson og hrósaði hinum magnaða Rooney í hástert. "Það var unaðslegt að fylgjast með honum í leiknum. Og að vera ekki nema 18 ára og spila eins og hann gerir - það er alveg ótrúlegt," sagði Eriksson. Rooney sjálfur gerði lítið úr eigin þætti og sagði góða liðsheild hafa skipt sköpum. "Liðið spilaði vel og ég var heppinn að fá tvö mörk út úr því. Við þurftum á þessum sigri að halda og hann eflir sjálfstraustið fyrir framhaldið".