Nuno Gomes hetja Portúgala

Portúgalar tryggðu sig áfram í átta liða úrslitin á EM í gærkvöld með naumum 1-0 sigri á nágrönnum sínum, Spánverjum. Mikil spenna var í riðlinum fyrir leikinn og með jafntefli hefðu Spánverjar komist áfram en gestgjafarnir ekki. Eins og við mátti búast einkenndi taugaspenna leikinn sem þó bauð upp á ágætis tilþrif inn á milli og nokkur dauðafæri litu dagsins ljós og mörkin hefðu hæglega getað orðið fleiri. Sigurmarkið gerði Nuno Gomes á 57. mínútu upp á eigin spýtur, sneri sér laglega og þótt skotið hafi ekki verið sérlega fast þá var það gríðarlega nákvæmt og óverjandi fyrir Spænska markvörðinn. Spánverjar reyndu allt hvað þeir gátu til að jafna metin og leikurinn opnaðist upp á gátt. Harmsaga þeirra á stórmótum hélt þó áfram og enn eina ferðina veldur þetta mikla knattspyrnuland vonbrigðum eftir miklar væntingar að venju. Þjálfari Spánverja, Inaki Saez, var að vonum niðurlútur eftir leik og nánast öruggt má telja að hann hafi stjórnað Spænska landsliðinu í síðasta sinn: "Við lögðum okkur alla fram í fyrri hálfleik en skorti ástríðuna. Hana höfðu Portúglar hins vegar en mark þeirra kom úr hálffæri og þegar við síst bjuggumst við því. Eftir það þurftum við að breyta leik okkar og fengum nokkur mjög góð færi en boltinn vildi bara ekki inn," sagði Saez og bætti við: "Leikmenn mínir eru gjörsamlega niðurbrotnir núna eins og við má búast. Það voru gerðar miklar væntingar til okkar fyrir mótið, eins og venjulega, en því miður stóðum við ekki undir þeim og okkur var greinilega ekki ætlað að komast áfram." Fyrirliði Portúgala, Luis Figo, var stoltur eftir leik en liðið náði að snúa við blaðinu eftir afar óvænt tap gegn Grikkjum í fyrsta leik, með tveimur sigrum: "Við unnu vel fyrir þessum sigri og getum verið stoltir af frammistöðu okkar. Þegar leikið er á heimavelli er pressan óneitanlega öllu meiri en venjulega og við höfðum allir áhyggjur af því hvaða áhrif hún myndi hafa á leik okkar í keppninni. Við byrjuðum illa en snerum bökum saman og náðum takmarki okkar sem var að komast áfram úr riðlinum," sagði Luis Figo, með bros á vör.