Herferð gegn nauðgunum

V-dagssamtökin hafa hafið herferð gegn nauðgunum fyrir verslunarmannahelgina. Í tilkynningu frá samtökunum segir að herferðin eigi að beina þeim skilaboðunum til stráka að þeir þurfi að vera vissir um að samþykki til kynlífs sé til staðar því kynlíf án samþykkis sé alltaf nauðgun. Slagorðin eru aðallega tvö „Sumir eiga bara séns í dauðar stelpur“ og „Vertu maður - virtu merkin“. Notuð eru umferðarmerki eins og biðskyldumerkið og stöðvunarskylduna á táknrænan hátt í herferðinni. Skilaboðin frá stelpunum eru jafn skýr og auðskiljanleg og umferðamerkin og það á að vera jafn auðvelt að virða þau, að því er segir í tilkynningunni. Þetta er í þriðja skiptið sem V-dagurinn hefur herferð gegn nauðgunum fyrir verslunarmannahelgi. Þær hafa alltaf beinst að gerendum þar sem mikilvægast er að þeir taki skilaboðin til sín. Herferðin er unnin í samstarfi við auglýsingastofuna Hvíta Húsið og munu auglýsingarnar birtast í fjölmiðlum og á strætóskýlum borgarinnar næstu daga. Styrktaraðilar herferðinnar eru Landsbankinn og Actavis. V-dagurinn eru alþjóðleg samtök gegn ofbeldi á konum sem stofnuð voru árið 1998 af Eve Ensler, höfundi Píkusaga. Samtökin taka fyrir mismunandi baráttumál í hverju landi fyrir sig. V-dagssamtökin voru stofnuð hér á landi árið 2002 og var áhersla strax lögð á baráttu gegn nauðgunum og þá sérstaklega þar sem vinir og kunningjar eru gerendur. Myndin er frá útihátíðinni Uxa á Kirkjubæjarklaustri árið 1995. Þeir sem eru á myndinni tengjast ekki efni fréttarinnar.