Bláfjöll kjörin fyrir vindmyllur

Það mætti minnka uppistöðulón í vatnaflsvirkjunum framtíðarinnar með því að samreka þær með vindaflsvirkjunum. Þetta segir Hreinn Hjartarson, veðurfræðingur hjá Veðurstofu Íslands, en á fundi Orkustofnunar í gær um um nýja möguleika til orkuöflunar var kynnt rannsókn undir hans stjórn á hugsanlegri nýtingu vindorku á landinu. Rannsóknum á Suður- og Vesturland er lokið og á næstunni verður unnið að því að klára verkið allt í kringum landið. Hreinn segir að stærstu tegundir vindmylla séu sextíu metra háar með um þrjátíu til fjörutíu metra löngum spöðum. "Þetta eru mikil mannvirki," segir Hreinn. "Þetta er í líkingu við að setja spaða á Hallgrímskirkjuturn. Þess vegna yrði mikil sjónmengun af þessu og því má reikna með að þetta yrði umdeilt." Hann segir Bláfjallasvæðið tilvalið fyrir vindmyllur miðað við niðurstöðu Veðurstofunnar. Einnig sé slétt undirlendi Suðurlands kjörið vindmyllusvæði. Það sé jafnvel hentugra en Bláfjöllin vegna hættu á ísingu þegar ofar kemur í landið. Ein vindmylla af stærstu gerð framleiðir um eitt og hálft megavatt. Til samanburðar framleiðir Kröfluvirkjun um 60 til 70 megavött. Hreinn segir að jafnan séu reistar nokkrar vindmyllur saman til að auka framleiðsluna. Vindorka er hins vegar óáreiðanleg og því segir Hreinn að það sé árennilegast að reka vatnsaflsvirkjun og vindaflsvirkjun saman til að auka öryggi framleiðslunar. Þá sé helst að treysta á vindorku á veturna þegar lítið sé í uppistöðulónum og framleiðsla vatnsaflsvirkjana er í lágmarki. Auk þess sé hægt að framleiða virkjanir með minni uppistöðulónum ef þær eru samreknar með vindaflsvirkjunum. Þannig megi draga úr áhrifum á náttúruna á viðkvæmum svæðum. Hreinn segir að tækni í nýtingu vindorku þróist hratt um þessar mundir og hún verði sífellt hagkvæmari. Hann býst því við nokkurri eftirspurn eftir vindmyllum þegar rannsókninni lýkur.