Stjórnarsamstarfið traust

Fundi formanna stjórnarflokkanna lauk nú fyrir stundu í stjórnarráðinu. Ráðherrarnir veittu stutt viðtöl en vildu ekki meina að neinn ágreiningur væri uppi sem ekki væri hægt að leysa. Engin niðurstaða virðist þó liggja fyrir og málið enn óleyst. Halldór Ásgrímsson formaður Framsóknarflokksins vildi ekkert gefa upp um niðurstöðu fundarins, sagði aðeins að stjórnarsamstarfið stæði traustum fótum. Halldór Ásgrímsson sagði að hann og Davíð hefðu farið yfir fjölmiðlámálið og stöðu þess. Það væri hins vegar ekki þess eðlis að ríkisstjórnin springi á því. Ekki er líklegt að Halldór og Davíð hittist aftur fyrr en eftir helgi en það er þó óráðið. Þeir útilokuðu ekki neitt, hvorki að gerðar yrðu breytingar á frumvarpinu eða að það yrði dregið til baka með öllu. Eins og fram kom í fréttum Bylgjunnar í hádeginu vill forysta Framsóknarflokksins að fjölmiðlafrumvarpið verði dregið til baka. Líklegast er að óskað verði eftir að nýtt frumvarp verði lagt fram sem felli fjölmiðlalögin úr gildi, en að öðrum kosti verði þjóðaratkvæðagreiðsla. Áhrifamiklir menn innan Framsóknarflokksins hafa hist á fundi undanfarna daga og rætt málið og áhrif þess innan flokksins. Litið er á stöðuna nú sem prófraun á Halldór í formannsembætti flokksins en þetta er alvarlegasti ágreiningurinn sem komið hefur upp í stjórnarsamstarfinu. Fundi í allsherjarnefnd Alþingis var slitið um hádegisbil og verður ekki framhaldið fyrr en í fyrsta lagi á morgun. Formaður Samfylkingarinnar segir að stjórnarmeirihlutinn geti ekki komið sér saman í málinu og að ríkisstjórnin sé að springa. Bjarni Benediktsson formaður allsherjarnefndar hafnar því að beðið sé eftir skipunum frá formönnum stjórnarflokkanna.