Hákon Eydal játar morðið á Sri

Hákon Eydal, fyrrverandi sambýlismaður Sri Ramawati, hefur viðurkennt að hafa banað henni og varpað líkinu af í sjóinn við Hofsvík á Kjalarnesi. Fjölskylda hins grunaða á hús á svæðinu. Fyrrverandi sambýlismaður Sri Ramawati, Hákon Eydal, viðurkenndi í yfirheyrslum hjá lögreglu á Litla-Hrauni nú síðdegis að hafa banað Sri í íbúð sinni í Stórholti sunnudaginn 4. júlí síðastliðinn. Í gær urðu þáttaskil í rannsókn málsins þegar banamaður hennar viðurkenndi að hafa losað sig við lík hennar við Presthúsatanga við Hofsvík á Kjalarnesi. Hann kom þangað í gærkvöldi í fylgd lögreglu og vísaði henni á staðinn. 130 björgunarsveitarmenn leituðu Sri í í gærkvöldi. Leitað var meðfram allri strandlengju Kjalarness inn að botni Kollafjarðar bæði af sjó og landi, en án árangurs. Hinn grunaði var færður til yfirheyrslu í gærkvöldi eftir að hafa verið uppi á Kjalarnesi, hann viðurkenndi ekki þá að eiga þátt í dauða hennar en að sögn Ómars Smára Ármannssonar aðstoðar yfirlögregluþjóns viðurkenndi hann að vera valdur að dauða hennar við yfirheyrslum síðdegis. Leitin að Sri heldur áfram af fullum krafti. Um klukkan tvö í dag komu kafarar lögreglunnar upp í Hofsvík og kafarar Landsbjargar bættust svo í hópinn á fjórða tímanum. Aðstæður til leitar voru mjög erfiðar, enda dimmt yfir og hvasst og lítið skyggni. Þá segja kafararnir að á þessu svæði sé gríðarmikill sjávargróður. Undir kvöld fóru svo um 130 björgunarsveitarmenn til leitar. Þeir leita eftir strandlengjunni frá Hvalfirði inn að Geldinganesi við Grafarvog. Þá er einnig ætlunin að fara með leitarflokka í eyjar og sker í Kollafirði. Auk mannanna verða 2 björgunarskip og 6 bátar notuð við leitina. Vanir björgunarsveitarmenn sem fréttastofa hefur rætt við í dag segja strauma á svæðinu með þeim hætti að mestar líkur séu á að lík sem sett sé í sjóinn á þessum slóðum geti rekið í átt að og alla leið vestur á Snæfellsnes. Ómar Smári Ármannsson, aðstoðaryfirlögregluþjónn sagði í samtali við fréttastofu að grunur lögreglu hefði mjög fljótlega beinst að Hofsvík. Þar hefði í tvígang verið leitað í upphafi rannsóknar út frá ákveðnum vísbendingum sem lögregla hafði. Staðreynd er að fjölskylda hins grunaða á gamalt hús þarna skammt frá, en Ómar Smári vill ekki staðfesta að það sé ástæða þess að grunur beindist fljótt að þessu tiltekna svæði.