Rkið kosti atkvæðagreiðslu

Sveitarfélögin fara fram á það við forsætisráðherra að þurfa ekki að bera kostnað af þjóðaratkvæðagreiðslu um fjölmiðlalögin. Sé miðað við að atkvæðagreiðslan kosti á annað hundrað milljóna króna er áætlaður kostnaður sveitarfélaganna á milli 60 og 70 milljónir. Í stjórnartíðindum sem út komu í dag eru kynntar þær breytingar sem verða á útvarps- og samkeppnislögum samkvæmt fjölmiðlafrumvarpi forsætisráðherra og fyrirhugað er að þjóðin kjósi um. Allajafna er formálinn við lagabirtingar svohljóðandi: Forseti gjörir kunnugt: Alþingi hefur fallist á lög þessi. Blað er því brotið með þeim formála sem birtist með fjölmiðlalögunum, en þar segir: Forsætisráðherra gjörir kunnugt: Alþingi hefur fallist á lög þessi, en forseti Íslands synjað þeim staðfestingar. Undirskrift og innsigli er Davíðs Oddssonar. Eins og getið er um í stjórnarskrá fá frumvörp lagagildi þótt forseti neiti að staðfesta þau. Þau skulu þá fara svo fljótt sem kostur er undir atkvæði allra kosningabærra manna í landinu. Frekar er ekki fjallað um framkvæmd slíkrar þjóðaratkvæðagreiðslu, sem nú er fyrirhuguð í fyrsta sinn. Samband íslenskra sveitarfélaga hefur farið fram á það við forsætisráðherra að þau taki ekki þátt í þeim kostnaði sem fylgir atkvæðagreiðslunni. Sambandið sendi forsætisráðherra bréf þessa efnis þar sem meðal annars segir að afstaða sambandsins hljóti að teljast afar eðlileg. Eftir sem áður sé ekkert sem útiloki það að sveitarfélögin annist framkvæmd atkvæðagreiðslunnar þótt kostnaðurinn verði greiddur af öðrum. Þórður Skúlason, formaður Sambands íslenskra sveitarfélaga, segir sveitastjórnarmenn lengi hafa verið þeirrar skoðunar að óeðlilegt sé að sveitarfélögin beri kostnað af alþingiskosningum og forsetakosningum og segist Þórður líta þjóðaratkvæðagreiðslu sömu augum.   Forsætisráðherra hefur sagt að kostnaður við fyrirhugaða þjóðaratkvæðagreiðslu geti numið 100-200 milljónum króna. Af þeirri upphæð telur Þórður að kostnaður sveitarfélaga sé á milli 60 til 70 milljónir sem færu í að greiða kjörstjórnum laun, sem og þeim sem annast og sjá um framkvæmdir á kjördag. Þórður segir Samband íslenskra sveitarfélaga ekki ennþá hafa fengið svör við athugasemdum sínum.