Starfslokasamningar hljóti samþykki hluthafa

Stjórnum fyrirtækja verður gert skylt að leggja starfslokasamninga undir hluthafafund nái væntanlegt frumvarp Samfylkingarþingmanna um breytingar á hlutafélagalögum fram að ganga. Össur Skarphéðinsson, þingmaður Samfylkingarinnar, segir að þar með yrðu það ekki fámennar klíkur sem tækju ákvarðanir um slíka samninga heldur raunverulegir hluthafar í viðkomandi fyrirtækjum.

Hafa hundruð milljóna af ökumönnum

Félag íslenskra bifreiðaeigenda segir að olíufélögin hafi hækkað álagningu sína um allt að fimmtán prósent þrjá síðustu mánuði nýliðins árs, sem nemi hækkun til neytenda upp á 600 til 700 milljónir króna á ársgrundvelli.

Sonur Sharons segir af sér

Omri Sharon, sonur Ariels Sharon, forsætisráðherra Ísraels, hefur sagt af sér þingmennsku. Omri var ákærður fyrir að taka við erlendum fjárframlögum til að standa straum af kosningabaráttu föður síns fyrir Likud-flokkinn árið 1999. Forsætisráðherrann verður þó ekki ákærður vegna skorts á sönnunum.

Desember hlýr en umhleypingasamur

Hiti mældist um 2,5 stigum yfir meðallagi bæði í Reykjavík og á Akureyri í desember en mánuðurinn var almennt fremur hlýr en umhleypingasamur eftir því sem Trausti Jónsson veðurfræðingur segir. Meðalhiti í Reykjavík mældist 2,3 stig og er það 2,5 stigum yfir meðallagi. Þetta er nokkru hærri hiti en í desember í fyrra og hitteðyrra en talsvert kaldara en í metmánuðinum 2002.

Blása nýju lífi í félagið

Forsvarsmenn Skátafélagsins Stróks í Hveragerði og Bandalags íslenskra skáta ætla að vinna saman að því að byggja upp aðstöðu skátafélagsins eftir að skátaheimilið og stór hluti búnaðar brann í eldsvoða í flugeldasölu á Gamlársdag.

Þríhnúkar rannsaka Þríhnúkagíg

Kópavogsbær hefur samið við Þríhnúka um rannsóknir á Þríhnúkasvæðinu innan Bláfjallafólkvangs. Komast á að því hvort hægt sé að gera Þríhnúkagíg, dýpstu og næst stærstu hraunhvelfinguheims, manngenga.

Ófært á Dynjandis- og Hrafnseyrarheiðum

Þoka er á Hellisheiði samkvæmt upplýsingum frá Vegagerðinni og getur hún gert vegfarendum erfitt fyrir. Ófært er um Dynjandisheiði og Hrafnseyrarheiði, flughált í Gufudal, á Klettshálsi og Kleifaheiði.

Rannsóknardeildin réð úrslitum

Lögreglan á Akranesi verður lykilembætti á Vesturlandi samkvæmt ákvörðun Björns Bjarnasonar dómsmálaráðherra en ekki Borgarnes eins og nefnd sem gerði tillögur um fækkun lögregluumdæma gerði tillögu um. Björn segir helstu ástæðuna þá að rannsókn lögreglumála sé eitt af stærstu verkefnum lykilembætta og mikil og góð reynsla sé af rannsóknastarfi á Akranesi.

Vilja ekki eitt landsfélag sjómanna

Félagar í Sjómannadeild AFLs, starfsgreinafélags Austurlands, höfnuðu hugmyndum um sameiningu sjómanna í eitt landsfélag á aðalfundi sínum síðasta fimmtudag.

Skæruliðar sprengdu olíuborholur

Skæruliðahópur í Kólumbíu sprengdi átta olíuborholur og þrjár olíuleiðslur í loft upp í Amasonregnskógunum í gær. Olían hefur valdið miklum umhverfisspjöllum og liggur nú á 100 kílómetra löngum kafla árinnar Putumayo.

Hættan minni í Sorpu en talið var

Betur fór en á horfðist þegar mikinn reyk lagði frá eimingarpotti í efnamóttöku Sorpu á aðalvinnslusvæði fyrirtækisins í Gufunesi á tíunda tímanum. Allt tiltækt slökkvilið á höfuðborgarsvæðinu var kallað út. Ljóst er að illa hefði getað farið þar sem ýmis hættuleg efni eru meðhöndluð í efnamóttökunni og því var viðbúnaður slökkviliðs þetta mikill. Engan starfsmann sakaði og tjón er talið það lítið að starfsemi verður líklega haldið áfram síðar í dag.

Neiti orkukaupum frá Norðlingaölduveitu

Náttúruverndarsamtök Íslands vilja að Alcan lýsi því yfir að fyrirtækið muni ekki kaupa orku frá Norðlingaölduveitu í Þjórsárverum. Með þessu geti fyrirtækið lagt sitt af mörkum til náttúruverndar á Íslandi segir í áskorun samtakanna til Alcan.

ESA kannar jafnréttislög í Noregi

Eftirlitsstofnun EFTA hefur hafið rannsókn á því hvort lög í Noregi sem kveða á um að að minnsta kosti fjörutíu prósent stjórnarmanna í fyrirtækjum skuli vera af hvoru kyni samræmist reglum Evrópusambandsins. Þeim verða Norðmenn að hlíta í gegnum EES-samninginn.

Mál meints hryðjuverkamanns falið bosnískum yfirvöldum

Danska lögreglan hefur hætt við að ákæra einn þeirra sem handteknir voru vegna gruns um að skipuleggja hryðjuverkaárás í landinu og falið bosnískum yfirvöldum málið. Maðurinn sem um ræðir var handtekinn í Bosníu síðla síðasta árs en hann er Dani af tyrknesku bergi brotinn.

Víða er flughált

Ófært er um Dynjandis- og Hrafnseyrarheiðar og flughált í Gufudal, á Klettshálsi Kleyfarheiði og á milli Patreksfjarðar og Bíldudals samkvæmt upplýsingum frá Vegagerðinni. Flughált er einnig á Eyjarfjalli, Steingrímsheiði og Lágheiði.

Varað við skemmdarverkum á laxeldiskvíum í Noregi

Lögregla í Noregi hefur hvatt laxeldisfyrirtæki til að vera á varðbergi gagnvart skemmdarverkum sem kunni að verða unnin á kvíum þeirra. Þetta kemur fram í norska blaðinu Aftenposten. Lögregla rannsakar nú hvort herskáir umhverfisverndarsinnar hafi skemmt kvíar í Finnmörku í júní í fyrra en þá sluppu um hundrað þúsund laxar úr kvíunum.

Telja meirihluta þingmanna spilltan

Meirihluti þingmanna er spilltur að mati meirihluta Bandaríkjamanna samkvæmt skoðanankönnun Gallup fyrir CNN og USA Today. Ekki nóg með það heldur telja þeir að um fimmtungur þingmanna sé mjög spilltur.

Eldur í efnamóttöku

Allt slökkvilið á höfuðborgarsvæðinu hefur verið kallað út vegna reyks í efnamóttöku Sorpu á aðalvinnslusvæði fyrirtækisins í Gufunesi. Slökkviliðið kom á staðinn nú rétt fyrir fréttir og var að kanna aðstæður en starfsmaður í efnamóttöku Sorpu sagði að engin hætta hefði reynst á ferðum, þarna hefði verið gufureykur en enginn eldur.

Lést í svifvængjuslysi

32 ára íslenskur karlmaður, Rúnar V. Jensson, lést í Kólumbíu á Gamlársdag þegar svifvængja sem hann flaug hrapaði til jarðar. Hann var einhleypur og barnlaus.

Segir skýringar olíufélaga á hækkunum fyrirslátt

Félag íslenskra bifreiðaeigenda telur að þær skýringar olíufélaganna, að rekja megi bensínhækkanir í fyrradag til hækkunar á heimsmarkaðsverði, séu fyrirsláttur.

Strætó til háborinnar skammar

Það er til háborinnar skammar að Strætó bs. bjóði ekki upp á sérstakt staðgreitt fargjald fyrir unglinga á þrepi milli þess sem börn og fullorðnir greiða, segir í ályktun frá Ungmennaráði Hafnarfjarðar. Þetta segir ráðið ekki síst til skammar þar sem ungmenni séu stór hluti af viðskiptavinum Strætó.

Unglingspiltar kveikja næstum í

Minnstu munaði að þrír unglingspitlar hefðu kveikt í íbúðarhúsi í Kópavogi í nótt þegar þeir tróðu logandi kínverjum og froskum inn um bréfalúgu í húsinu. Húsráðandi náði að slökkva eldinn í forstofunni og lögregla hafði uppi á piltunum, sem reyndust hafa leikið sama leikinn í örðu húsi

Brotist inn í Grafarvogskirkju

Brotist var inn í Grafarvogskirkju í nótt og þaðan stolið söfnunarbauk. Engar skemmdir virðast hafa verið unnar nema hvað þjófurinn braut stóra rúðu til að komast inn. Ekki liggur fyrir hversu mikið fé var í bauknum og þjófurinn er enn ófundinn.

Þak hrundi á stórmarkað í Ostrava

Þak hrundi á stórmarkaði í bænum Ostrava í norðausturhluta Tékklands um hálfáttaleytið í gærkvöld. Mikill snjór hafði safnast fyrir á þakinu sem gaf undan. Stórmarkaðurinn var enn opinn þegar slysið varð en ekki hafa enn borist fregnir af því hvort slys hafi orðið á fólki.

Þjófur svaraði í símann

Klaufaskapur innbrotsþjófs varð honum að falli á dögunum þegar hann álpaðist til að svara hringingu sænsku lögreglunnar í farsíma sem hann hafði nýlega tekið ófrjálsri hendi. Maðurinn hafði brotist inn í hús í bæ í Norður-Svíþjóð og látið þar greipar sópa og þar á meðal nælt sér í farsíma. Lögregla hringdi í símann og maðurinn svaraði en hirti ekki um að leggja á.

Samningaviðræður hafnar um gasútflutning

Samningaviðræður hófust að nýju í gærkvöld á milli Úkraínumanna og Rússa um gasútflutning til Úkraínu. Rússneska gasfyrirtækið Gazprom lokaði fyrir gasútflutning til Úkraínu á nýársdag eftir að Úkraínumenn höfðu neitað að borga uppsett verð en stjórnmálskýrendur segja málið frekar snúast um stjórnmál en peninga

Allir námuverkamennirnir í Virginíu látnir nema einn

Aðeins einn af kolanámuverkamönnunum sem sátu fastir í námu í Vestur-Virginíu komst lífs af samkvæmt nýjustu fregnum, en svo virðist sem upplýsingum um málið hafi verið snúið við. Tólf menn létu því lífið en ekki einn. Talsmaður kolanámufyrirtækisins greindi fjölskyldum mannanna frá þessu.

Vertíð „póstkassaskemmdarvarga" hafin

Vertíð þeirra sem stunda þá iðju að sprengja póstkassa bæjarins er nýhafin. Þar til gerðar læsingar á póstkössunum virðast ekki stöðva skemmdarvargana.

Skæruliðahópar sprengja olíuborholur

Skæruliðarhópur í Kólumbíu sprengdi átta olíuborholur og þrjár olíuleiðslur í loft upp í Amasonregnskógunum í gær. Olían hefur valdið miklum umhverfisspjöllum og liggur nú á 100 km löngum kafla árinnar Putumayo.

Allt að 200 manns fórust í aurskriðu í Indónesíu

Talið er að allt að 200 manns hafi farist þegar aurskriða féll á þorp í um 130 kílómetra fjarlægð frá Jakarta, höfuðborg Indónesíu, í gær en aurskriðan reif með sér heilt þorp og hafa björgunarmenn aðeins fundið tólf manns á lífi. Þá eyðilögðust brýr og vegir sem hefur gert björgunarmönnum enn erfiðara fyrir sem og veðrið en mikið hefur rignt á svæðinu síðustu vikur. Milljónir manna búa upp til fjalla í Indónesíu og hefur dánartíðni vegna aurskriða hækkað mikið á síðustu árum.

Kveikt í fólksbíl

Grunur leikur á að kveikt hafi verið í fólksbíl, sem sem stóð fyrir utan Krónuna við Jafnasel í Breiðholti og barst eldurinn í annann bíl við hliðina. Slökkviliðinu var tilkynnt um eldinn um klukkan hálf sex í morgun og logaði í báðum bílunum, þegar að var komið.

Grunar lögbrot í stofnfjárviðskiptum í SPH

Fjármálaeftirlitið grunar að lög um fjármálafyrirtæki hafi verið brotin við kaup á stofnfjárhlutum í Sparisjóði Hafnarfjarðar í fyrrasumar og hefur Ríkislögreglustjóri hafið rannsókn á málinu, að sögn Morgunblaðsins. Grunur leikur á að ýmist hafi upplýsingum verið leynt, eða rangar upplýsingar verið gefnar.

Ökumaður slapp ótrúlega

Ökumaður, sem var einn í bíl sínum, slapp ótrúlega lítið meiddur þegar bíll hans fór út af Reykjanesbraut í gærkvöld, valt niður grasbala og hafnaði niður á Fífuhvammsveginum, Svo vel vildi til að þar var engin á ferðinni þegar slysið varð. Bíllinn aflagaðist svo mikið í veltunni að beita þurfti klippum til að ná ökumanni út úr flakinu og var hann fluttur á slysadeild til aðhlynningar. Hann reyndist ekki alvarlega slasaður. Bíllinn er hinsvegar gjör ónýtur. Tildrög slyssins liggja ekki fyrir en engin hálka var á veginum og ökumaðurinn var ódrukkinn.

Hjálparstarf liggur niðri í Pakistan

Allt hjálparstarf liggur nú niðri í Pakistan vegna mikils snjós og rigningar sem hefur aukið mikið á raunir eftirlifendur jarðskjálftans þar sem um 90 þúsund manns fórust. Flætt hefur inn í tjöld sem flóttamenn hafast við í og er talið að um þrjár milljónir manna séu heimilislausir og búi í bráðabirgðaskýlum og tjöldum sem á engan hátt eru nógu sterk til að þola vetrarkuldann.

Omri Sharon segir af sér

Omri Sharon, sonur Ariels Sharons, forsætisráðherra Ísraels, sagði í gær af sér þingmennsku eftir að hafa verið sakfelldur fyrir ólöglega fjármögnun kosningabaráttu. Omri tók við erlendum fjárframlögum til að standa straum af kosningabaráttu föður síns í Likud flokknum árið 1999 en erlend fjárframlög eru bönnuð samkvæmt kosningalögum í Ísrael.

Tólf námuverkamenn í V-Virginíu fundust á lífi

Tólf þeirra kolanámumanna sem festust inni í námu í Vestur-Virginíu í Bandaríkjunum snemma í gærmorgun, fundust á lífi í morgun. Þá var einn látinn. Óttast var að allir hefðu farist en mennirnir voru fastir á um eitt hundrað metra dýpi og sýndu mælingar mikið magn eiturefna í andrúmsloftinu í námunni.

Bílslys við Smáralind

Bíl var ekið út af á mislægum gatnamótum við Smáralind á tíunda tímanum í kvöld. Samkvæmt upplýsingum frá lögreglu mun bílstjórinn ekki vera mikið slasaður.

Námumennirnir enn lokaðir inni í Sago kolanámunni

Ekki er enn búið að bjarga námumönnunum 13 sem lokuðust inni þegar sprenging varð í Sago kolanámunni í Virginíafylki í Bandaríkjunum um hádegi í gær. Óvíst er hversu lengi þeir geta lifað inn í námunni en súrefni er þar af skornum skammti. Mælingar gefa til kynna að kolsýringur mælist langt yfir hættumörkum þar sem mennirnir eru lokaðir inni. Ekki er enn vitað hvað olli sprengingunni en ekki er útilokað að neisti frá eldingu hafi orsakað sprenginguna.

Félag dagforeldra hvetur dagforeldra til að nýta niðurgreiðslur borgarinnar til að hækka laun sín

Stjórn Barnavistunar, félags dagforeldra, hvetur félaga sína til að nýta sér auknar niðurgreiðslur til að hækka laun sín, ekki til að lækka kostnað foreldra. Niðurgreiðslur hækkuðu 1. janúar.

Hallgrímur Snorrason verður formaður

Hallgrímur Snorrason hagstofustjóri, verður formaður nefndar sem ætlað er að stuðla að lækkun matarverðs á Íslandi. Neytendasamtökin kröfðust þess í dag að fá fulltrúa í nefndina.

Alþingi og ráðuneyti eiga að endurskoða viðskipti sín við FL Group

Alþingi og ráðuneyti eiga að endurskoða viðskipti sín við FL Group, segir Jóhanna Sigurðardóttir alþingismaður, og efna til útboðs. Hún segir að FL Group hafi tekið forystu í græðgisvæðingunni sem gengur út á að fita forstjórana. Ofurkjarasamningar kyndi ófriðarbál í samfélaginu.

Ætla að þjarma að sjóræningjum

Íslensk stjórnvöld ætla að þjarma að sjóræningjum sem stunda ólögmætar og óábyrgar veiðar á norðvestur Atlantshafi og Reykjaneshrygg. Ætlunin er að torvelda eins og unnt er rekstur hentifánaskipa.

Höfðað meiðyrðamáli gegn Sigurði Líndal lagaprófessor

Friðrik Þór Guðmundsson, faðir ungs manns sem lést í Skerjafjarðarslysinu, hefur höfðað meiðyrðamál gegn Sigurði Líndal lagaprófessor vegna ummæla hans í bréfi til fjölmiðla. Friðrik segir Sigurð Líndal hafa logið upp á sig sökum og að það hafi verið sér mikið áfall.

Þrír fluttir á slysadeild með minniháttar meiðsl eftir harðan árekstur

Þrír voru fluttir á slysadeild með minniháttar meiðsl eftir harðan árekstur tveggja bíla á gatnamótum Grensásvegar og Miklubrautar á sjötta tímanum í kvöld. Ökumenn beggja bílanna voru í bílbeltum en farþegi annars bílsins var ekki í belti. Bílarnir eru mikið skemmdir og þurfti kranabíl til að fjarlægja þá.

Halla Tómasdóttir ráðin framkvæmdastjóri Viðskiptaráðs Íslands

Framkvæmdastjórn Viðskiptaráðs Íslands hefur ráðið Höllu Tómasdóttur sem framkvæmdastjóra ráðsins frá 1. mars n.k. Hún tekur við starfinu af Þór Sigfússyni, sem nýlega var ráðinn forstjóri Sjóva.