Nýr stjóri Chelsea fékk óska­byrjun

Charlton situr neðarlega í ensku B-deildinni og það mátti því búast við þægilegum leik fyrir heimsmeistarana í þessum Lundúnaslag. Sú varð raunin og Chelsea vann að lokum 5-1 sigur eftir tvö mörk í uppbótartímanum.

Sigurinn hefði getað orðið mun torsóttari ef Jorrel Hato hefði ekki brotið ísinn fyrir Chelsea rétt fyrir lok fyrri hálfleiks, með sannkölluðu þrumuskoti.

Tosin Adarabioyo tvöfaldaði svo forskotið snemma í seinni hálfleik með frábærum skalla, eftir aukaspyrnu Facundo Buonanotte.

Heimamenn gáfust samt ekki upp og hinn stæðilegi Miles Leaburn minnkaði muninn í 2-1 á 57. mínútu en Marc Guiu gerði sitt besta til að slökkva allar vonir Charlton með marki fimm mínútum síðar.

Eftir það var aldrei hætta á öðru en að Chelsea færi áfram í 32-liða úrslitin og þeir Pedro Neto og Enzo Fernández innsigluðu sigurinn í lokin. Neto skoraði upp á sitt einsdæmi, laglegt mark, áður en Estevao krækti í vítaspyrnu eftir laglega takta og Enzo skoraði úr henni.

Rosenior fær öllu þyngra próf í næsta leik þegar Chelsea mætir Arsenal í undanúrslitum enska deildabikarsins, á miðvikudagskvöld.