Pútín tekur vel í „friðar­á­ætlun Trumps“

Umrædd friðaráætlun var skrifuð af bandarískum og rússneskum erindrekum, án aðkomu ráðamanna í Úkraínu eða Evrópu, og hefur verið lýst sem „óskalista“ Pútíns. Greining blaðamanna Guardian bendir til þess að hlutar skjalsins hafi verið þýddir beint úr rússnesku.

Sjá einnig: Svona lítur friðaráætlun Bandaríkjamanna og Rússa út

Hún er í 28 liðum og þykir halla verulega á Úkraínumenn. Í áætluninni eru þó nokkrir liðir sem Úkraínumenn hafa áður sagt að komi ekki til greina, eins og að gefa eftir landsvæði, og áætlunin þykir óljós hvað varðar öryggisráðstafanir í framtíðinni. Þá eru liðir í áætluninni sem ráðamenn í Evrópu munu eiga erfitt með að sætta sig við.

Donald Trump, forseti Bandaríkjanna, hefur farið fram á að Vólódímír Selenskí, forseti Úkraínu, skrifi undir áætlunina fyrir næsta fimmtudag. Bandaríkjamenn eru sagðir hafa gefið til kynna að ef Selenskí skrifi ekki undir gætu þeir stöðvað flæði vopna og upplýsinga frá Bandaríkjunum til Úkraínu.

Trump sjálfur sagði við blaðamenn í gær að Selenskí yrði að sætta sig við áætlunina.

Í ávarpi til úkraínsku þjóðarinnar sagði Selenskí í gær að Úkraínumenn stæðu frammi fyrir mjög erfiðum kostum.

Sagði Evrópumenn ekki átta sig á stöðunni

Á áðurnefndum fundi í gærkvöldi sagði Pútín að engin formleg skilaboð varðandi friðaráætlunina hefðu borist til Moskvu. Það taldi hann vera vegna þess að Úkraínumenn og ráðamenn í Evrópu væru mótfallnir tillögunum.

„Svo virðist sem Úkraínumenn og bandamenn þeirra í Evrópu séu enn haldnir þeirri tálsýn að hægt sé að sigra Rússland á vígvellinum,“ sagði Pútín samkvæmt RIA fréttaveitunni. Þá bætti hann við að þeir áttuðu sig ekki á því hvað væri að gerast á vígvellinum.

„Ef Kænugarður neitar að ræða friðaráætlun Trumps, verða bæði þeir og evrópsku stríðsmangararnir að skilja að það sem gerðist í Kúpíansk muni óhjákvæmilega gerast annars staðar á víglínunni,“ sagði Pútín.

Það að bakhjarlar Úkraínu beri ábyrgð á þjáningum Úkranumanna og stríðinu yfir höfuð með því að hafa framlengt það með stuðningi við Úkraínumenn er algengur áróður frá Rússum.

Sjá einnig: Sakar Evrópu um stríðsæsingu

Rússneski forsetinn lýsti því svo yfir að hann væri að mestu sáttur við stöðuna á víglínunni.

Forsvarsmenn rússneska hersins lýstu því yfir á dögunum að þeir hefðu náð fullum tökum á borginni Kúpíansk í Karkívhéraði. Úkraínumenn neita því og segja enn barist um borgina en Rússar hafa reynt að ná henni um nokkuð langt skeið.

Rússar hafa sótt fram víða í austurhluta Úkraínu á undanförnum árum en framsókn þeirra hefur verið hæg og mjög kostnaðarsöm.