Drifu sig í vel heppnað leg­göngu­boð

Átakið er tvíþætt. Annars vegar fjáröflun og hins vegar vitundarvakning um málefnið. Góðgerðarfélagsið Lífskraftur sem Snjódrífurnar halda um og hefur styrkt málefni krabbameinssjúkra um tæplega 30 milljónir undanfarin þrjú ár. Samstarfsaðilar Lífskrafts eru Feel Iceland og 66°Norður en hluti af átakinu fólst í sölu á svokallaðri Leggöngupeysu en allur ágóði af sölunni rennur til Lífskrafts.

Leggangan verður farin laugardaginn 7. október. Rúmlega 120 konur ætla með og liggur leiðin um norðurbrúnir Landmannaöskjunnar og uppgöngu á sjálfa Háölduna sem rís um 1150 metra yfir sjávarmál og er hæsta fjallið á Landmannalaugasvæðinu.

Í Ásmundarsal fór leiðangurskonan og Snjódrífan Brynhildur Ólafsdóttir yfir ferðina sjálfa. Elísa Viðarsdóttir, fræðslu- og þróunarstjóri Feel Iceland og landsliðskona í knattspyrnu ræddi góða næringu. Lífskraftskonan og þingkonan Þorgerður Katrín Gunnarsdóttir hélt tölu og deildi reynslu sinni af veikindum systur sinnar sem lést fyrir tæpu ári eftir snarpa baráttu við krabbamein.

Snjódrífurnar Sirrý Ágústsdóttir og Soffía Sigurgeirsdóttir greindu auk þess stuttlega frá málþingi Lífskrafts sem var haldið fyrr í mánuðinum í Háskólanum í Reykjavík. 

Á málþinginu hélt Kolbrún Pálsdóttir, yfirlæknir kvenlækningadeildar Landspítalans, meðal annars erindi þar sem fram kom að árlega greinast um eitt hundrað konur á barneignaraldri með krabbamein á Íslandi og að í mörgum tilfellum hefur meinið og eða krabbameinsmeðferðin neikvæð áhrif á frjósemi þessara kvenna. 

Kolbrún tók það skýrt fram í erindi sínu að það væri mikilvægt að koma á skýrari verkferlum og staðlaðri ráðgjöf fyrir þennan hóp við greiningu.

Fleiri myndir sem Anton Brink tók má sjá að neðan.