Hildigunnur fulltrúi Íslands á Feneyjatvíæringnum 2024

„Þetta er dásamlegt og það er auðmjúk tilfinning sem fylgir því að hafa fengið að vera valin og fengið þetta tækifæri,“ segir Hildigunnur í samtali við blaðamann.

Í fréttatilkynningu frá Icelandic Art Center segir meðal annars: „Tvíæringurinn er einn mikilvægasti vettvangur samtímalistar á heimsvísu og það er mikill heiður fyrir þann íslenska myndlistarmann sem valinn er til þátttöku á tvíæringnum hverju sinni.

Þátttaka Íslands á Feneyjatvíæringnum hófst árið 1960. Myndlistarmiðstöð, áður nefnd Kyningarmiðstöð íslenskrar myndlistar (KÍM), hefur líkt og undanfarin ár umsjón með íslenska skálanum fyrir hönd Menningar- og viðskiptaráðuneytisins.

Allir aðilar Fulltrúaráðs Myndlistarmiðstöðvar fengu boð um að senda allt að þrjár tillögur að listamanni, sýningarstjóra eða sýningarhugmynd og bárust fjöldi hugmynda. Fagráð Myndlistarmiðstöðvar, auk tveggja gesta, fór yfir tillögur og valdi listamann úr þeim hópi.“

Réttur staður á réttri stundu

„Eins og fyrirkomulagið er þá getur maður ekki beint stefnt að þessu og það er ekki alveg í eðli minnar myndlistar að selja sig mikið út og verða eitthvað heildar concept. Þetta er auðvitað eitthvað sem mann dreymir um í listnámi en er á sama tíma óraunverulegt. Þetta snýst svolítið um heppni og að vera á réttum stað á réttri stundu,“ segir Hildigunnur og bætir við: „Ég er ótrúlega þakklát fyrir að þetta hafi raðað sér svona saman.“

Hildigunnur Birgisdóttir útskrifaðist frá Listaháskóla Íslands árið 2003 og býr og starfar í Reykjavík. Á síðasta ári voru verk hennar á sýningum í Listasafni Reykjavíkur, listasafninu GES-2, sem rekið er af V-A-C Foundation í Moskvu og H2H í Aþenu. Verk hennar má meðal annars finna í safneign Listasafns Íslands, Listasafns Reykjavíkur, Nýlistasafnsins og European Patent Office.

„Á marglaga ferli sínum hefur Hildigunnur rannsakað hugmyndir okkar um fegurð, notagildi, samhengi hlutanna og hvetur áhorfandann til að efast um jafnvægið á milli skynjunar og raunveruleika. Hún skoðar oft fáfengilega hluti á borð við takka lyklaborðs, plastklemmur og úðabrúsa, og er hver hlutur valinn út frá einfaldleika sínum eða tilvist.

Með því að setja fram óskáldlega hluti í nýjum efnum og stærðum undirstrikar Hildigunnur kunnuglega eiginleika þeirra en samtímis því dregur hún notagildi þeirra í efa. Bjögunin undirstrikar skúlptúrískt gildi hinna upprunalegu hluta og fagnar fagurfræði þess sem fæstir gefa gaum,“ segir einnig í fréttatilkynningunni.

Aðspurð hvað einkenni list hennar segir Hildigunnur:

„Það sem ég vona allavega er að listin mín fari stundum ótroðnar slóðir og opinberi hugsun mannsins.“

Fagráðið í valferlinu skipuðu þau Starkaður Sigurðarson (f.h. SÍM), Auður Jörundsdóttir (forstöðumaður Myndlistarmiðstöðvar) og Harpa Þórsdóttir (f.h. listasafna). Gestir fagráðs voru Una Björg Magnúsdóttir og Sigurður Guðjónsson.

Fulltrúaráð KÍM samanstendur af einum fulltrúa frá öllum viðurkenndum listasöfnum á Íslandi, Samtökum listamannarekinna myndlistarrýma, Myndstefi og fimm fulltrúum Sambands íslenskra myndlistarmanna.