Erlent

„Þetta land er Úkraína“

Samúel Karl Ólason skrifar
Jens Stoltenberg, framkvæmdastjóri Atlantshafsbandalagins.
Jens Stoltenberg, framkvæmdastjóri Atlantshafsbandalagins. EPA/OLIVIER HOSLET

Jens Stoltenberg, framkvæmdastjóri Atlantshafsbandalagsins (NATO), segir væntanlega innlimun Rússa á fjórum héruðum Úkraínu vera marklausa og alvarlegt brot á alþjóðalögum. Hann segir að ríki NATO muni ekki láta af stuðningi við rétt Úkraínumanna til fullveldis og sjálfsvarnar og að sviðsettar atkvæðagreiðslur Rússa hafi ekki lögmæti.

„Þetta land er Úkraína,“ sagði Stoltenberg.

Þessu lýsti Stoltenberg yfir á Twitter í dag og sagðist hann einnig hafa komið þessu á framfæri við Vólódímír Selenskí, forseta Úkraínu.

Selenskí sagðist hafa þakkað Stoltenberg fyrir yfirlýsingar hans um ólögmæti aðgerða Rússa í Úkraínu.

Undanfarna daga hefur farið fram atkvæðagreiðsla á yfirráðasvæðum Rússa í Úkraínu og lauk henni í dag.  Samkvæmt útgönguspám kaus yfirgnæfandi meirihluti fólks sem á að hafa tekið þátt í atkvæðagreiðslunni með því að ganga í rússneska sambandsríkið, eða rúm 96 prósent íbúa.

Vert er að benda á að framkvæmd atkvæðagreiðslunnar var langt frá því að vera eðlileg og að niðurstaðan hefur verið ljós frá því lýst var yfir að hún yrði haldin. Það mátti meðal annars glögglega sjá á ummælum rússneskra ráðamanna.

Pútín mun ávarpa rússneska þingið á föstudaginn og er gert ráð fyrir því að hann muni þá tilkynna innlimun héraðanna, sem saman mynda um fimmtán prósent Úkraínu.

Sjá einnig: Boða innlimun, heita syndaaflausn og hóta kjarnorkustríði

Landvinningar Rússa í Úkraínu eru ekki öruggir og eru rússneskar hersveitir víða á hælunum. Úkraínumenn eru sagðir hafa náð góðum árangri í norðanverðu Donetsk-héraði á undanförnum dögum, í kjölfar gífurlega vel heppnaðar gagnárásar gegn Rússum fyrir tveimur vikum. Sú árás leiddi til þess að Rússar hörfuðu frá öllu héraðinu og hafa Úkraínumenn haldið þeirri sókn áfram.

Nú virðist sem Úkraínumenn vinni að því að umkringja hersveitir Rússa í borginni Lyman í Donetsk-héraði.

Úkraínskir hermenn hafa þegar myndað stórt gat í víglínum Rússa norður af Lyman og hafa fregnir borist af því að þeir hafi náð þó nokkrum bæjum og þorpum á svæðinu á sitt vald á undanförnum dögum. Úkraínumenn eru einnig sagðir hafa sótt fram austur af borginni í dag, þær fregnir hafa þó ekki verið staðfestar þegar þetta er skrifað.

Í frétt Wall Street Journal (áskriftarvefur) segir að sókn Úkraínumanna ógni yfirráðum Rússa í Donetsk og Luhansk, sem saman mynda Donbas-svæðið svokallaða. Úkraínumenn séu að frelsa bæi og þorp sem Rússar hafi náð tökum á í apríl.

Blaðmaður og ljósmyndari miðilsins eru í fylgd með úkraínskum hermönnum við Lyman og segir hann baráttuanda rússneskra hermanna vera lítinn eftir undanhaldið frá Kharkív. Þá segir hann frá því að rússneskir hermenn hafi verið handsamaðir í nærliggjandi þorpi á sunnudaginn og þeir hafi margir hverjir verið ölvaðir.

„Þeir sem voru allsgáðir flúðu og þeir sem voru ölvaðir áttuðu sig ekki á því að það væri verið að ráðast á þorpið og voru handsamaðir,“ sagði einn hermaður við ljósmyndarann.


Tengdar fréttir

Greindu sprengingar við Nord Stream leiðslurnar

Tvær sprengingar greindust greinilega á mælitækjum í Svíþjóð og Noregi þegar göt mynduðust á Nord Stream 1 og Nord Stream 2 leiðslunum í Eystrasalti. Þá birtu Danir í dag myndefni sem sýnir lekana á yfirborði hafsins.

Kokkur Pútíns játar að eiga Wagner

Rússneski auðjöfurinn Yevgeny Prigozhin hefur viðurkennt að hafa stofnað og eiga málaliðahópinn Wagner Group. Hann segist hafa stofnað hópinn eftir innrás Rússa í Úkraínu 2014 og með því markmiði að senda málaliða til austurhluta Úkraínu.

SÞ: Stríðsglæpir framdir á hersetnu svæðunum í Úkraínu

Nauðganir, pyntingar og einangrunarvistun barna á sér stað á hersetnum svæðum Rússa í Úkraínu, að sögn yfirmanns rannsóknarnefndar Sameinuðu þjóðanna. Vísbendingar hafa fundist um fjölda aftaka þar sem fólk hefur verið skorið á háls eða skotið í höfuðið.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.