Fyrr­verandi utanríkismálastjóri ESB hand­tekinn

Húsleit var einnig gerð hjá Evrópuháskólanum í Brugge og á heimilum nokkurra einstaklinga, að sögn embættis saksóknara Evrópusambandsins. 

Embættið nafngreindi ekki þá handteknu en AFP-fréttaveitan hefur eftir heimildum sínum að Mogherini sé á meðal þeirra. Hún er núverandi rektor Evrópuháskólans.

Þá segir Politico að Stefano Sannino, ítalskur embættismaður sem er yfir málefnum Miðausturlanda, Norður-Afríku og Persaflóa hjá framkvæmdastjórn ESB, hafi verið handtekinn. Þriðji maðurinn sé stjórnandi hjá Evrópuháskólanum.

Aðgerðirnar tengjast rannsókn á svonefndum diplómataskóla Evrópusambandsins sem þjálfar unga erindreka og misferli með fjármuni sambandsins í tengslum við útboð vegna starfsemi hans.

Utanríkisþjónusta ESB bauð þjálfunarverkefnið út fyrir tímabilið 2021 til 2022 og hlaut Evrópuháskólinn hnossið. Saksóknaraembættið segist hafa „sterkar grunsemdir“ um að útboðsferlið hafi ekki verið í samræmi við samkeppnislög.

Þannig sé rökstuddur grunur uppi um að fulltrúar Evrópuháskólans hafi fengið pata af kröfunum sem gerðar yrðu til verktaka áður en verkefnið var boðið út. Rannsóknin beinist einnig að því hvort að háskólinn hafi haft ástæðu til að ætla að hann fengi verkefnið, jafnvel áður en útboðið var auglýst.

Blaðið Politico hefur eftir háttsettum embættismanni hjá ESB að rannsókn á útboðinu hafi verið hafin áður en Kaja Kallas, núverandi utanríkismálastjóri sambandsins, tók við embætti.

Evrópuháskólinn býður upp á undirbúningsnám fyrir íbúa aðildarríkja sambandsins sem hyggja á feril innan evrópska stjórnkerfisins.

Mogherini var utanríkismálastjóri ESB frá 2014 til 2019 en tók við sem rektor Evrópuháskólans árið 2020. Áður var hún utanríkisráðherra í ríkisstjórn Matteo Renzi á Ítalíu árið 2014.

Fréttin hefur verið uppfærð.