Innlent

Létt yfir Lækjargötu eftir niðurrif

Heimir Már Pétursson skrifar
Nú er hægt að aka og ganga beggja megin Vonarstrætis frá Lækjargötu.
Nú er hægt að aka og ganga beggja megin Vonarstrætis frá Lækjargötu. Stöð 2/Einar

Það hefur létt mikið yfir Lækjargötunni eftir að svört grindverk og hindranir voru fjarlægðar. Gatan á hins vegar eftir að taka enn meiri stakkaskiptum á komandi árum þegar fyrsta áfanga borgarlínu verður lokið.

Það var einhvern tíma vel fyrir tíma kórónuveirufaraldursins sem tveimur akreinum í Lækjargötu til suðurs var lokað og þær girtar af vegna framkvæmda við nýtt hótel. Fyrir nokkrum dögum voru akreinarnar loksins opnaðar aftur.

Svona leit þetta svæði út í mörg ár þar sem svört grindverk í kringum hótel í byggingu og alls kyns aðrar hindranir þrengdu ekki aðeins að umferð bíla og strætisvagna heldur einnig gangandi og hjólandi vegfarenda. Það var því mun léttara yfir mannlífinu í Lækjargötu í dag enda miðborgin full af erlendum ferðamönnum innan um nú greiðfærari umferðina.

Alexandra Briem nýkjörin formaður umhverfis- og skipulagsráðs er hæst ánægð með nýja hótelið og greiðari gönguleiðir.Stöð 2/Einar

Alexandra Briem var kjörin tímabundið formaður umhverfis- og skipulagssviðs borgarinnar í dag í afleysingum fyrir Dóru Björt Guðjónsdóttur oddvita Pírata og er hæstánægð.

„Já, já þið sjáið hvað þetta er bjart og opið og það er miklu meira gaman að labba leiðina hérna í Lækjargötunni núna. Þetta er mikill munur. Húsið er líka mjög vel heppnað, fallegt og fellur mjög vel að götumyndinni. Ég er rosaánægð með þetta. Gaman að sjá þetta,“ sagði Alexanda.

Þetta er þó ekki framtíðarmynd Lækjargötunnar. Hún er hluti af fyrsta áfanga borgarlínu frá Kársnesinu og fleiri stöðum inn í miðborgina.

Vinstra megin á myndinni sjáum við akreinarnar sem nú hafa verið opnaðar aftur eftir mörg ár. Breið gangstétt er fyrir framan nýja hótelið.Stöð 2/Einar

„Framtíðarsýnin er að þetta verði borgargata með aðeins hægari umferð. Meira til að ganga eftir, það verði borgarlína, ekki þessi gegnumstreymisæð sem hún er búin að vera. Þannig að við förum vonandi að sjá einhverjar langtímabreytingar á þessu. Það er nú samt vissulega gaman að opna þetta núna og fá gönguleiðina betri,“ segir Alexandra.

Með komu borgarlínunnar muni vonandi færri þurfa vera á bíl til að komast í miðborgina. Framkvæmdir við hana hefjist sennilega á næstu tveimur til þremur árum.

Nýja hóteliðgerbreytir hins vegar götumynd bæði Vonarstrætis og Lækjargötu.

Það er kannski fyrst núna þegar búið er að rífa grindverkið utan af horninu á hótelinu sem við sjáum í raun og veru hvernig það lítur út. Ég er viss um að þeir sem koma til Reykjavíkur í fyrsta skipti eftir nokkur ár halda að svona að hafi þetta alltaf verið.


Tengdar fréttir

Gamli turninn á Lækjar­torgi fær nýtt hlut­verk

Gamli söluturninn á Lækjartorgi, sem hefur lengi vel verið eitt helsta kennileiti miðbæjarins, fær nýtt hlutverk á næstunni þegar honum verður breytt í hljómturn en til stendur að gera turninn að miðpunkt tónlistar í miðbænum.

Lækjartorg verður inngangurinn að Kvosinni

Lækjartorg mun taka stakkaskiptum á næstu misserum og verður lyft upp á spennandi og áhugaverðan hátt samkvæmt tillögunni Borgaralind eftir Sp(r)int Studio og Karrens en Brands, sem bar sigur úr býtum í hönnunarsamkeppni um Lækjartorg og aðliggjandi gatnarými. Reykjavíkurborg vekur athygli á þessu í tilkynningu.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.