Enski boltinn

United með sitt „allra besta lið“ í kvöld en þarf „toppframmistöðu“

Sindri Sverrisson skrifar
Ralf Rangnick hefur ekki átt neina draumabyrjun í starfi hjá Manchester United en hann starfar sem bráðabirgðastjóri út leiktíðina.
Ralf Rangnick hefur ekki átt neina draumabyrjun í starfi hjá Manchester United en hann starfar sem bráðabirgðastjóri út leiktíðina. Getty/Martin Rickett

Þjóðverjinn Ralf Rangnick, knattspyrnustjóri Manchester United, segist lengi hafa verið mikill aðdáandi ensku bikarkeppninnar. Hann teflir fram sínu sterkasta liði í kvöld gegn Aston Villa.

Rangnick, sem er 63 ára gamall, var á Wembley árið 1980 þegar West Ham vann Arsenal 1-0 í bikarúrslitaleik. Hann vonast til þess að komast með United á nýja Wembley en til þess þarf liðið að byrja á að ryðja sprækum Villa-mönnum úr vegi í kvöld, í 64-liða úrslitum.

„Ég hef alltaf verið mikill aðdáandi bikarkeppninnar. Ég man árið 1980 eða 1981, þegar ég varði ári í Brighton, að ég fór á bikarúrslitaleikinn á Wembley. Þetta var kveðjugjöf frá liðsfélögum mínum í Southwick,“ sagði Rangnick á blaðamannafundi.

„Fyrir mér er þetta afar mikilvæg keppni. Við munum svo sannarlega reyna að spila á okkar allra besta liði í þessum leik.

Við tökum leikinn eins alvarlega og hægt er og vonandi komumst við áfram í næstu umferð en til þess þarf okkur að ganga vel gegn Aston Villa. Við vitum að þetta verður ekki auðvelt því þeim hefur gengið vel, sérstaklega eftir að þeir skiptu um stjóra,“ sagði Rangnick og vísaði til komu Stevens Gerrard sem ekki myndi leiðast að fagna sigri á Old Trafford.

„Þeir hafa unnið fjóra leiki og tapað fjórum, þar af þremur gegn toppliðunum. Við þurfum toppframmistöðu til að komast áfram,“ sagði Rangnick.


Enska bikarkeppnin, FA Cup, er á Stöð 2 Sport en upplýsingar um útsendingar má finna hér. FA Cup er hluti af Stöð 2 Sport erlent sem kostar 3.990 krónur á mánuði.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.