Innlent

Borgin tekur tvær sneiðar til viðbótar af flugvellinum

Kristján Már Unnarsson skrifar
Flugvél Landhelgisgæslunnar, TF-SIF, lendir á Reykjavíkurflugvelli í dag.
Flugvél Landhelgisgæslunnar, TF-SIF, lendir á Reykjavíkurflugvelli í dag. Arnar Halldórsson

Nýtt aðalskipulag Reykjavíkur gerir ráð fyrir að tvær sneiðar verði skornar af Reykjavíkurflugvelli á næstu þremur árum og að vellinum verði svo endanlega lokað eftir áratug, árið 2032.

Í fréttum Stöðvar 2 kom fram að samkvæmt aðalskipulaginu, sem borgarstjórn samþykkti þann 19. október, er vera flugvallarins framlengd til ársins 2032. Áður var miðað við að honum yrði lokað árið 2024. 

Frá undirritun flugvallarsamkomulagsins í nóvember 2019.

Vísað er til samkomulags borgarstjóra og samgönguráðherra frá því í nóvember 2019 um að stefnt skuli að því að flytja flugstarfsemina yfir á nýjan völl í Hvassahrauni, reynist það vænlegur kostur.

Engu að síður gerir borgin ráð fyrir að saxa meira af flugvellinum á næstu árum. Er það til viðbótar við Hlíðarendasvæðið, sem tekið var með lokun minnstu flugbrautar vallarins árið 2016. 

Strax á komandi ári er gert ráð fyrir að svæði í Skerjafirði verði tekið undir uppbyggingu nýs íbúðahverfis. Borgin stefnir jafnframt að því að flugskýlin í Fluggörðum víki í síðasta lagi árið 2024.

Úr aðalskipulagi Reykjavíkur. Myndin sýnir að landið má nýta undir flugvöll til ársins 2032. Skýlin í Fluggörðum mega þó aðeins vera til ársins 2024.Aðalskipulag Reykjavíkur

En hvernig líst ráðherra samgöngumála á þá þróun?

„Ja, það er auðvitað í gangi sameiginleg yfirlýsing okkar borgarstjóra um að Reykjavíkurflugvöllur verði þar sem hann er og í óbreyttri mynd, með fullkomið rekstraröryggi, þangað til annar nýr flugvöllur eða flugvallarstæði finnst,“ svarar Sigurður Ingi Jóhannsson innviðaráðherra.

Úr Fluggörðum. Þar er miðstöð kennslu- og einkaflugs á Reykjavíkurflugvelli.Arnar Halldórsson

Um Fluggarðana vísar borgin til eldra samkomulags ríkis og borgar frá árinu 2013 um að einka- og kennsluflugi skuli fundinn nýr staður.

„Þar voru menn auðvitað að horfa til, ef til þess kæmi, að Hvassahraun yrði möguleiki, að það yrði þá fyrsta skrefið að flytja æfingaflugið þangað. Nú held ég að það séu nú fáir sem trúi því að það verði að veruleika.

Þannig að við höfum verið að skoða aðra möguleika. En við þurfum að fá svigrúm til þess,“ segir Sigurður Ingi.

Séð yfir Hvassahraun í átt til Hafnarfjarðar.Stöð 2/Egill Aðalsteinsson.

Tekið er fram í samkomulagi ráðherra og borgarstjóra frá 2019 að ef Hvassahraun reynist ekki vænlegur kostur taki aðilar upp viðræður um Reykjavíkurflugvöll að nýju.

Fréttamaðurinn Ómar Ragnarsson, einn reyndasti flugmaður þjóðarinnar, hefur bent á að Skerjafjarðarsvæðið gæti væri lykillinn að málamiðlun um fyrirferðarminni flugvöll. En væri þá ekki óheppilegt ef það svæði væri þá horfið undir íbúðabyggð? 

Telur innviðaráðherra ástæðu til þess að biðja borgaryfirvöld um að bíða með uppbyggingu í Skerjafirði?

Séð yfir svæðið í Skerjafirði sem borgin áformar að leggja undir íbúðabyggð.

„Ja, þetta er náttúrlega hluti af löngu ferli, og hefur farið í dómstóla, um þetta land. Og þetta liggur svona fyrir.

Isavia, sem fer með okkar mál, þarf auðvitað að passa upp á það að allt flugöryggi sé í lagi innan flugverndarsvæðis vallarins. Þannig að ég lít svo á að það séu allir að passa sitt,“ svarar Sigurður Ingi.

Hér má sjá frétt Stöðvar 2:


Tengdar fréttir

Flugvallarstæði í Hvassahrauni á hættusvæði

Samgönguráðherra segir að ef umbrotin á Reykjanesi leiði til eldgoss kalli það á endurmat á Hvassahrauni sem flugvallarkosti. Sérfræðingar segja Hvassahraun á hættusvæði, fari að gjósa.

Segir nýja byggð í Skerjafirði atlögu gagnvart flugvellinum

Áform borgarstjórnarmeirihlutans um nýja byggð í Skerjafirði, sem kynnt verða á morgun, eru atlaga að Reykjavíkurflugvelli og skemmdarverk af stærstu gráðu, að mati Vigdísar Hauksdóttur, borgarfulltrúa Miðflokksins.

Svona sér Ómar sátt um flugvöll

Flugmaðurinn sem lent hefur oftar á Reykjavíkurflugvelli en flestir aðrir, Ómar Ragnarsson, segir fáránlegt að einn besti möguleikinn til málamiðlunar verði strax útilokaður.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.