Segir rangt að reka Struijk út af fyrir tæklinguna á Elliott

Á 60. mínútu tæklaði Struijk Elliott með þeim afleiðingum að sá síðarnefndi fótbrotnaði. Struijk var svo rekinn af velli.

„Strákurinn er það mikilvægasta en ég er ekki viss um að þetta sé rautt spjald,“ sagði Neville á Sky Sports eftir leikinn í gær.

„Rauða spjaldið er vegna afleiðinganna sem tæklingin hafði, ekki vegna hennar sjálfrar. Þetta er ekki gott. Leikmönnunum sem sáu þetta var brugðið og Jürgen Klopp er brjálaður.“

Elliott var í byrjunarliði Liverpool í þriðja leiknum í röð í gær en hann hefur fengið mikið lof fyrir frammistöðu sína.

Þessi átján ára miðjumaður lék sem lánsmaður með Blackburn Rovers í ensku B-deildinni á síðasta tímabili. Hann lék 41 deildarleik með liðinu og skoraði sjö mörk.