Fundu minjar frá landnámi um fiskverkun á Seyðisfirði

Kristján Már Unnarsson skrifar 30. ágúst 2021 22:44

Ragnheiður Traustadóttir fornleifafræðingur. Arnar Halldórsson

Fornleifafræðingar sem vinna við uppgröft í Seyðisfjarðarbæ eru komnir niður á mannvirki frá landnámsöld sem virðist hafa verið nýtt til fiskverkunar. Fornminjarnar fundust undir skriðu sem féll fyrir sexhundruð árum.

Í fréttum Stöðvar 2 mátti sjá rannsóknarsvæðið en þar féll mannskæðasta snjóflóð Íslandssögunnar árið 1885 og tók 24 mannslíf og ellefu hús. Fyrirhugað er að reisa þar snjóflóðavarnargarða en fyrst þarf að kanna hvaða sögu jörðin geymir.

Fornminjarnar eru í útjaðri núverandi byggðar á Seyðisfirði, skammt norðan kirkjunnar.Arnar Halldórsson

Fornleifarannsóknin er sú mannfrekasta á Íslandi um þessar mundir. Við hana starfa tólf fornleifafræðingar og fornleifanemar enda þarf að vinna rösklega.

Ragnheiður Traustadóttir fornleifafræðingur segir hafa komið á óvart hvað hér voru margar og veglegar byggingar áður en flóðið féll, raunar heilt þorp.

„Það hefur bara verið áhugavert að sjá það því það er lítið rannsakað frá nítjándu öldinni og átjándu öldinni,“ segir Ragnheiður.

Í efsta laginu eru grunnar af húsum sem eyðilögðust í snjóflóðinu mannskæða árið 1885.Arnar Halldórsson

Þegar dýpra er grafið finnast merki um yfir tvöhundruð metra breiða skriðu sem féll yfir svæðið í kringum árið 1400.

„Við erum að grafa núna í burtu þessa skriðu og undir henni koma þá allar þessar elstu minjar.“

Þær elstu virðast ná aftur til tíundu aldar.

„Við erum með gjósku úr landnámssyrpunni sem er frá 940. Við erum að sjá það í torfinu. Þannig að það er að minnsta kosti eftir 940.

En það getur vel verið að við séum með eitthvað alveg frá bara 870, eða frá þessum sem við teljum vera landnámstíma,“ segir fornleifafræðingurinn.

Veglegar steinhleðslur hafa komið í ljós.Arnar Halldórsson

Þessar elstu minjar virðast þó ekki vera hefðbundin bæjarhús.

„Ég held að þetta sé einhverskonar nytjastaður. Hugsanlega tengist þetta sjósókn. Við erum með fullt af beinalögum með fiskibeinum og slíkt.

Og við höfum ennþá ekki fundið neina gripi. En fullt af veggjabrotum sem eru mjög gamlir. Og aðallega beinalög.

Og jú: Tvær sleggjur sem eru frá miðöldum. Sleggjurnar geta bent líka til þess að menn hafi verið að vinna fisk.“

Fornleifafræðingarnir hafa skamman tíma því brátt á að hefjast handa við varnargarðana.

„Við höfum allavega út september. Og miðað hvað búið er að vera gott veður þá hef ég fulla trú á góðu hausti og þá náum við að klára,“ segir Ragnheiður en 22 stiga hiti mældist á Seyðisfirði í dag.

Hér má sjá frétt Stöðvar 2:

Fornminjar Múlaþing Aurskriður á Seyðisfirði Landnemarnir

Tengdar fréttir

Vísbendingar um landnámsbæ í Stöðvarfirði fyrir tíma Ingólfs

Fornleifarannsókn gefur sterka vísbendingu um að landnámsbýli hafi risið í Stöðvarfirði fyrir hið viðurkennda landnámsártal en ekki aðeins árstíðabundin veiðistöð, eins og í fyrstu var talið.

3. september 2018 21:00

Skýrar vísbendingar um veiðistöð fyrir landnám

Fornleifarannsókn í Höfnum á Reykjanesi hefur leitt í ljós mannvirki sem reist voru um það bil hálfri öld áður en Ingólfur Arnarson á að hafa numið land.

15. febrúar 2016 21:15

Sérstakur stofn rostunga hvarf við landnám Íslands

Tímamótarannsókn bendir til að sérstakur stofn rostunga hafi verið á Íslandi sem hvergi finnst annars staðar í heiminum og að stofninn hafi horfið við landnám.

22. desember 2018 20:00

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.