Tónlist

Shakira mögulega á leið fyrir dómara fyrir skattsvik

Samúel Karl Ólason skrifar
Shakira á Superbowl í fyrra.
Shakira á Superbowl í fyrra. Getty/Jeff Kravitz

Shakira, tónlistarkonan heimsfræga frá Kólumbíu, er í basli á Spáni, þar sem hún býr. Dómari í Barcelona komst að þeirri niðurstöðu eftir þriggja ára rannsókn að nægar vísbendingar séu fyrir því rétta yfir Shakiru fyrir að hafa komið 14,5 milljónum evra undan skatti.

Saksóknara hafa sakað Shakiru um sex mismunandi brot á skattlögum sem snúa að því að hún hafi falið mikið fé í skúffufélögum og svokölluðum skattaparadísum. Í frétt El País segir að verði Shakira dæmd sek gæti hún verið dæmd í fangelsi.

Fullt nafn söngkonunnar er Shakira Isabel Mebarak Ripoll.

El País vísar í úrskurð dómarans þar sem hann segir Shakiru hafa hætt að greiða skatta á Spáni árin 2012, 2013 og 2014 jafnvel þó henni hefði borið skylda til að greiða skatta á Spáni þessi ár.

Sjálf hefur Shakira haldið því fram að hún hafi búið á Bahamaeyjum þessi ár og bara kíkt til Barcelona af og til, þar sem eiginmaður hennar býr. Fótboltamaðurinn Gerard Piqué.

Rannsakendur hafa kafað djúpt í líf söngkonunnar og segja það ekki rétt. Hún hafi búið í Barcelona og á þessum árum hefði hún átt að greiða tekjuskatt af 14,5 milljón evra. Í úrskurði dómarans segir að Shakira hafi búið í Barcelona minnst 200 daga á hverju ári, af þeim þremur sem um ræðir.

Samkvæmt spænskum lögum er fólk skilgreint sem skattgreiðandi á Spáni ef það ver minnst 183 dögum á ári þar í landi.

Teymi söngkonunnar hefur lengi reynt að koma í veg fyrir að málið fari fyrir dómara. Í tilkynningu til CNN segir talsmaður hennar að búist hafi verið við þessar niðurstöðu. Annars myndu þau ekki tjá sig að svo stöddu.

Lögmannateymi Shakiru hefur nokkra daga til að bregðast við úrskurðinum. Þá eiga saksóknarar að skila inn skýrslu þar sem þeir útskýra hvaða refsingu þeir vilja ná fram. El País segir mögulegt að Shakira geti gert samkomulag við saksóknara til að komast hjá réttarhöldum. 




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.