Lífið

Seinheppni Árnýjar og Daða Freys heldur áfram

Kolbeinn Tumi Daðason skrifar
Daði Freyr Pétursson og Gagnamagnið voru fulltrúar Íslands í Eurovision í ár.
Daði Freyr Pétursson og Gagnamagnið voru fulltrúar Íslands í Eurovision í ár. Vísir/Vilhelm

Eurovision-parið Árný Fjóla Ásmundsdóttir og Daði Freyr Pétursson þarf að finna sér nýtt húsnæði sem allra fyrst í Berlín í Þýskalandi. Stóra lekamálið í íbúð þeirra hefur dregið dilk á eftir sér.

Árný Fjóla greinir frá því í hópnum Berlín, borgin okkar á Facebook að seinheppni þeirra Daða Freys ætli engan enda að taka þetta misseri.

Þau voru sem kunnugt er fulltrúar einu þjóðarinnar sem gátu ekki keppt í úrslitum Eurovision vegna Covid-19 smits í íslenska hópnum. Eftir heimkomuna frá Hollandi greindist Árný Fjóla svo með Covid-19 svo þau fóru beint úr langri sóttkví í einangrun.

Ekki hjálpaði til þegar leki úr þvottavél þeirra varð valdur að uppvakningu gamals og skæðs myglusvepps í húsi þeirra í Berlín. Þau voru nýlega flutt í húsið og höfðu ekki keypt sér heimilistryggingu. Greindi Árný frá því á dögunum að húseigandi og leigumiðlari hefðu dembt á þau 35 þúsund evru skuld, jafnvirði um fimm milljóna króna.

Árný, fremst til vinstri, ásamt restinni af Gagnamagninu sem sló í gegn í Eurovision í Hollandi þrátt fyrir að stíga ekki á svið.Baldur Kristjánsson

„Vegna stóra „lekamálsins“ hafa komið í ljós umtalsverðar eldri skemmdir á húsinu okkar, sem er auðvitað ekki okkar sök. Nú þarf að rífa upp allt gólfið í eldhúsi, gangi og baðherbergi. Okkur er gert að flytja úr íbúðinni okkar á meðan framkvæmdum stendur,“ segir Árný Fjóla.

Framkvæmdir gætu byrjað seinni hluta júlí og staðið hið minnsta út árið.

„Við leitum því að nýju íbúðarhúsnæði og leitum því til ykkar þar sem tímin er vissulega naumur (3 vikur!). Ég er komin 30 vikur á leið og við erum með eina 2 ára. Við viljum því sleppa við að flytja oft á einhverjum stuttum tíma og leitum því aðeins að langtímaleigu.“

Þau hafa mestan áhuga að vera í hverfunum Mitte, Prenze eða Schöneberg. Hundrað fermetrar með fjórum herbergjum væri ákjósanlegt og verð helst ekki mikið hærra en 2000 evrur á mánuði, um 300 þúsund krónur.


Tengdar fréttir

Daði Freyr og Árný laus úr einangrun

Daði Freyr Pétursson og Árný Fjóla Ásmundsdóttir losnuðu úr einangrun í gær. Árný  greindist með Covid eftir Eurovision, sú þriðja í Eurovision hóp Íslendinga.






Fleiri fréttir

Sjá meira


×