Frjálslyndi lýðræðisflokkurinn kynnir stefnumálin á nýrri heimasíðu

Hólmfríður Gísladóttir skrifar 11. maí 2021 07:44

Guðmundur og Glúmur verða meðal oddvita flokksins.

Frjálslyndi lýðræðisflokkurinn hefur opnað nýja heimasíðu, x-o.is. Þar eru tveir oddvitar kynntir til sögunnar; Guðmundur Franklín Jónsson og Glúmur Baldvinsson, og stefna flokksins í landbúnaðar- og sjávarútvegsmálum reifuð.

Um önnur stefnumál segir meðal annars að flokkurinn vill hækka persónuafsláttinn í 100 þúsund krónur á næsta kjörtímabili. Þá vill flokkurinn notast við þjóðaratkvæðagreiðslur til að útkljá „öll umdeildustu mál samtíðarinnar.“

Flokkurinn telur ekki rétt að selja Íslandsbanka að svo stöddu né heldur vill hann selja Landsvirkjun. Hann vill skoða að breyta Íslandsbanka eða Landsbankanum í samfélagsbanka og tryggja stöðu íslensku þjóðarinnar.

Frjálslyndi lýðræðisflokkurinn er á móti aðild að Evrópusambandinu, vill efna til atkvæðagreiðslu um aðild Íslands að Schengen-samstarfinu og hafna orkupakka fjögur. Hann vill Reykjavíkurflugvöll áfram í Vatnsmýri, setja Sundabraut og Sundabrú í forgang og er alfarið á móti Borgarlínu.

Þá er flokkurinn fylgjandi persónukjöri og vill beint kjör forsætisráðherra. Hann er fylgjandi því að tillögur stjórnlagaráðs verði lagðar til grundvallar nýrri stjórnarskrá og standa vörð um „hreina og ómengaða ímynd“ landsins, svo eitthvað sé nefnt.

Alþingiskosningar 2021 Frjálslyndi lýðræðisflokkurinn

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.