Enski boltinn

Fannst Fred ömurlegur þrátt fyrir markið

Ingvi Þór Sæmundsson skrifar
Fred skoraði langþráð mark fyrir Manchester United í gær.
Fred skoraði langþráð mark fyrir Manchester United í gær. getty/Adrian Dennis

Þrátt fyrir að Fred hafi skorað í 1-3 sigri Manchester United á Tottenham í ensku úrvalsdeildinni í gær fannst Roy Keane lítið til frammistöðu Brasilíumannsins koma. Raunar fannst Keane Fred ægilega lélegur í leiknum.

Fred jafnaði fyrir United á 57. mínútu þegar hann fylgdi eftir skoti Edinsons Cavani sem Hugo Lloris, markvörður Tottenham, varði. Þetta var aðeins annað deildarmark Freds fyrir United og það fyrsta síðan í september 2018.

Fred verður seint talinn markheppinn og það kom Keane á óvart að hann skildi ekki klúðra færinu.

„Það var eins gott að hann skoraði því mér fannst hann ömurlegur. Ég veit ekki hvað fólk er að tala um,“ sagði Keane á Sky Sports eftir leikinn í gær.

„Þetta var gott spil hjá United. Þríhyrningaspil í kringum vítateiginn, slakar varnarleikur hjá Tottenham og Fred var á réttum stað. Ég hélt reyndar að hann myndi klúðra en vel spilað.“

Cavani og Mason Greenwood voru einnig á skotskónum hjá United í gær. Þetta var fjórði deildarsigur liðsins í röð.

United er í 2. sæti ensku úrvalsdeildarinnar með 63 stig, ellefu stigum á eftir toppliði Manchester City.


Tengdar fréttir

Solskjær: Ef þetta væri sonur minn fengi hann ekki að borða

Það var mikill hiti í leik Tottenham Hotspur og Manchester United er liðin mættust í ensku úrvalsdeildinni í gær. Fór það svo að Man United vann 3-1 en það var atvik í stöðunni 0-0 sem var helsta umræðuefnið að leik loknum.

Mourinho: Ég skil ekkert sem tengist VAR

Jose Mourinho, stjóri Tottenham, telur sitt lið hafa verið óheppið með myndbandadómgæsluna í tapinu gegn Manchester United í ensku úrvalsdeildinni í dag.




Fleiri fréttir

Sjá meira


×