Lífið

Sjálfsrækt er ekki sjálfselska

Ragga Nagli skrifar
Ragnhildur Þórðardóttir, betur þekkt sem Ragga Nagli, skrifar um heilsu á Vísi.
Ragnhildur Þórðardóttir, betur þekkt sem Ragga Nagli, skrifar um heilsu á Vísi. Vísir/Vilhelm

Sjálfsrækt er grunnurinn í öllum samböndum, því hvernig þú kemur fram við sjálfan þig setur tóninn fyrir hvernig aðrir koma fram við þig.

Nú sem aldrei fyrr er mikilvægt að sinna eigin heilsu fyrst og fremst til að vera í stakk búin að aðstoða fólkið í kringum þig.

Við erum lokuð inni með fjölskyldunni og það er mannskepnunni eðlislægt að fá smá tíma fyrir sig í friði.

Við komumst ekki á kaffihús og í saumó en þörfin fyrir félagsskap er mannlegt eðli.

Grunnstoðir góðrar heilsu eru:

Góður svefn

Holl næring

Regluleg hreyfing

Félagsleg tenging

Jákvæðar hugsanir

Þegar við gefum okkur ekki tíma til að borða hollt verðum við orkulítil og pirruð.

Þegar við sinnum ekki þörf líkamans fyrir hreyfingu verðum við slenuð og þreytt.

Þegar við fáum ekki djúpa félagslega næringu frá vinum okkar verðum við einmana og svartsýn.

Þegar við sofum illa og stutt verðum við kvíðin og áhyggjufull.

Þegar við hugsum neikvætt tætum við niður sjálfstraustið og sjálfsmyndina.

Þegar við erum ekki ánægð innra með okkur þá verðum við ekki góðar manneskjur út á við.

Neikvæðar tilfinningar finna sér alltaf farveg.

Oftar en ekki í félagslegum samskiptum og viðbrögðum við nærumhverfinu.

Eða í kvíða og depurð og framtaksleysi.

Það er ekki eigingirni að taka kríulúr eftir vinnu.

Það er ekki tímasóun að slúðra í klukkutíma í símtólið við Siggu vinkonu.

Það er ekki andfélagslegt að setja á sig heyrnartól og lita í litabók inni í herbergi.

Það er ekki eigingirni að fara í freyðibað með Enyu að kyrja úr hátalaranum.

Sjálfsrækt getur falist í að segja stundum NEI við verkefnum.

Í hvert skipti sem þú segir JÁ við einhverju sem þú hefur ekki tíma né orku til að sinna, ertu samtímis að segja NEI við að eyða tíma með þínum nánustu.

Það er ekki hégómi að rífa í ketilbjöllu niðri í hjólageymslu.

Það er ekki átröskun að kjósa salat frekar en börger.

Það er ekki kukl að hlusta á hvetjandi hlaðvarp.

Það er ekki árátta þó þú púllir Reyni Pétur og farir í fjóra göngutúra á dag.

Að forgangsraða sjálfum sér er ekki eigingirni.

Þvert á móti er það í almannaþágu.

Það er djúp nauðsyn að sinna athöfnum sem gefa þér orku og næra líkama og sál til að verða betri manneskja og geta þannig sinnt fólkinu þínu, vinnunni og lífinu af þeirri alúð sem það krefst.

Það er djúp nauðsyn til að halda geðheilsunni í Kórónunni.

Sjálfsrækt er mikilvæg til að geta sinnt öllum hlutverkum þínum í lífinu.

Sjálfsrækt þarf ekki að kosta marga aura.

Sjálfsrækt þarf heldur ekki að taka marga klukkutíma.

Sjálfsrækt þarf bara smá athygli og forgang.

Ef þú setur ekki súrefnisgrímuna á þig fyrst verðurðu engum að gagni í flugvélinni.


Tengdar fréttir

Þarmaflóran er frægari en Beyoncé

Þarmaflóran hefur átt sitt stjörnumóment undanfarin ár enda hafa vísindamenn sjaldan kastað jafn mikilli vinnu og aurum í að skoða þetta sex metra langa líffæri sem hvílir fyrir miðjum skrokki.

Hundrað ára og eiturhress?

Ragga Nagli segir að leyndarmálið að langlífi og lífsgæðum sé blátt á litinn.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.