Vilja færa gjaldtöku af bensíni í vegtolla

Samtök atvinnulífsins hafa kynnt ríkisstjórninni hugmynd um breytta gjaldtöku í samgöngumálum. Hugmyndin snýst um að færa gjöld af eldsneyti yfir í vegtolla, og gæti komið stórum vegaframkvæmdum af stað, er mat samtakanna. Hugmyndinni er fálega tekið af Ögmundi Jónassyni innanríkisráðherra sem segir að um aukna skattpíningu sé að ræða með breyttum formerkjum.

SA hafa lagt áherslu á að hefja átak í samgöngumálum í tengslum við kjarasamninga, en allt frá stöðugleikasáttmálanum árið 2009 hefur verið rætt um slíkt átak. Lífeyrissjóðirnir höfðu lýst sig áhugasama um að koma að fjármögnun en þeir sögðu sig frá málinu í desember, fyrst og síðast vegna deilna um vegtolla.

„Það sem við höfum talið mögulegt til að brjóta þessa kyrrstöðu í samgöngumálunum er að gjaldtakan verði flutt af eldsneyti og sett í almenna vegtolla,“ segir Vilhjálmur Egilsson, framkvæmdastjóri SA, en hugmyndin var rædd óformlega við stjórnvöld í gær.

Ríkissjóður leggur hlutfallslegt gjald á innkaupsverð eldsneytis. Þegar það hækkar eykst skattheimtan. Með því að draga úr þessari gjaldtöku og taka upp fast gjald þegar ekið er um tilteknar samgönguæðar er mat SA að draga megi úr sveiflum á eldsneytisverði. Það tryggi hins vegar örugga og jafna innheimtu til að standa undir framkvæmdum. Sérstakt tímabundið gjald vegna nýframkvæmda gæti komið til greina samhliða, að sögn Vilhjálms.

Ögmundur Jónasson segir tillöguna ganga út á stórauknar álögur.

„Það sem er breytt síðan í fyrra, þegar rætt var um að skattleggja einstakar leiðir vegna framkvæmda á viðkomandi stað, er að nú er þessu smurt yfir landið allt. Mín sýn er sú að þetta sé almenn skattlagning sem ég hef efasemdir um að stemning sé fyrir í samfélaginu. Galdrastafur Vilhjálms Egilssonar breytir því ekki að verið er að tala um að afla viðbótartekna upp á tugi milljarða. Þeir peningar koma úr vösum landsmanna, ekki af himnum ofan,“ segir Ögmundur. - shá