Ríkisstjórnin efni tveggja ára gamlan sáttmála

Framkvæmdaáform stöðugleikasáttmálans fyrir tveimur árum hafa meira og minna brugðist og snúast kröfur Samtaka atvinnulífsins á hendur ríkisstjórninni nú í raun um að hún efni þau loforð sem þá voru gefin. Hvorki hefur tekist að draga úr atvinnuleysi né stöðva fólksflótta frá landinu.

Þegar forystumenn ríkis og sveitarfélaga, atvinnulífs og launaþegahreyfingar komu saman í Þjóðmenningarhúsinu fyrir tveimur árum til undirritunar stöðugleikasáttmála ríkti bjartsýni um að hann yrði grundvöllur endurreisnar. Það var ekki síst mikið atvinnuleysi sem knúði á um aðgerðir en það mældist þá 8,1 prósent.

Það hefur hins vegar aukist síðan og mælist nú 8,6%, á sama tíma og miklir fólksflutningar hafa verið frá landinu, - árið 2009 fluttu um 2.500 Íslendingar úr landi umfram þá sem fluttu til landsins, og síðan 1.700 í fyrra, eða samtals yfir fjögur þúsund Íslendingar á undanförnum tveimur árum.

Þegar rýnt er í nokkur lykilatriði stöðugleikasáttmálans sést að þau eru í raun þau sömu og Samtök atvinnulífsins eru nú, tveimur árum síðar, að biðja ríkisstjórnina að koma í verk. Hún hét því þá að greiða götu ákveðinna stórframkvæmda, og ryðja skjótt burt öllum hindrunum úr vegi Helguvíkurálvers, og hún ætlaði með samstarfi við lífeyrissjóði að efna til stórátaks í verklegum framkvæmdum.

Þar var líka fyrirvari Samtaka atvinnulífsins um að endurskoðun kvótakerfisins yrði höfð í sáttafarvegi.

Á sérstöku minnisblaði voru listar yfir allar framkvæmdirnar, bæði þær sem þegar voru hafnar, og hinar sem til stóð að hefja. Álver á Bakka, gagnaver, norðanlands og sunnan, ekki færri en þrjú stykki, koltrefjaverksmiðja, pappírsverksmiðja og nokkur stór orkuver, - allt átti að vera komið á fleygiferð, - í fyrra. Á framkæmdalista voru líka sjúkrahús, ný Hvalfjarðargöng, Vaðlaheiðargöng, breikkun Suðurlandsvegar og Vesturlandsvegar og einnig Sundabrautin. Svo var líka minnst á samgöngumiðstöð sem átti að verða fyrsta verkið. Skemmst er frá því að segja að nánast ekkert af þessu hefur ræst.

Vilhjálmur Egilsson, framkvæmdastjóri Samtaka atvinnulúfsins, sagði í dag að allar væntingarnar sem bundnar voru við stöðugleikasáttmálann hefðu meira og minna brugðist.