Kennari við Tónlistarskóla Ísafjarðar í sóttkví

Kennari við Tónlistarskóla Ísafjarðar er nú í sóttkví heima hjá sér að beiðni læknis vegna kórónuveirunnar sem veldur sjúkdómnum COVID-19.

Frá þessu er greint í færslu á Facebook-síðu tónlistarskólans en í gær var greint frá því að alls væru sex manns í sóttkví á Ísafirði vegna veirunnar.

Er fólkið í sóttkví samkvæmt tilmælum sóttvarnalæknis um að þeir sem nýkomnir eru úr ferðalögum frá svæðum sem skilgreind eru með mikla smitáhættu fari í heimasóttkví í alls fjórtán daga við heimkomu.

Að því er segir í færslu tónlistarskólans á Facebook er kennarinn við skólann algjörlega einkennalaus og því ekki ástæða til að ætla að hann sé sýktur. Þá sé starfsemi skólans að öðru leyti eðlilegt.

Fram kom í máli Þórólfs Guðnasonar, sóttvarnalæknis, á blaðamannafundi í gær að um tuttugu manns væru í sóttkví hér á landi vegna kórónuveirunnar.

Um svokallaða heimasóttkví er að ræða og er úrræðið frekar íþyngjandi miðað við þær leiðbeiningar sem sóttvarnalæknir hefur gefið út.

Þannig á einstaklingur í sóttkví að halda sig heima við og hafa bein samskipti við sem fæsta einstaklinga. Hann má ekki fara út af heimilinu nema brýna nauðsyn beri til og hann má ekki fara til vinnu eða skóla þar sem aðrir eru.

Þá má einstaklingur í sóttkví ekki fara á mannamót eða út í búð en hann má fara í bíltúr á sínum einkabíl. Hann má þó ekki eiga samskipti við aðra í návígi í bíltúrnum, svo sem við bílalúgur veitingastaða.