BSRB segir fjöldann sláandi

Helga Jónsdóttir, framkvæmdastjóri BSRB, segir fjölda ráðninga ráðuneytanna án auglýsinga vera sláandi og ekki í anda þess að sá hæfasti sé ráðinn í hvert skipti.

Fram kom í Fréttablaðinu í gær að frá ársbyrjun 2009 hafi 77 sinnum verið ráðið í stöður hjá ráðuneytunum án þess að staðan hafi verið auglýst.

Helga segir BSRB einmitt hafa árið 2007 mótmælt lagabreytingum þar sem ein grein gerði ráð fyrir að ekki þyrfti að auglýsa stöður ef ráðið væri innan Stjórnarráðsins.

„Enn eru sömu rök í gildi og BSRB var með þá. Við kölluðum eftir gagnsæi í ráðningum þannig að farið sé yfir hæfni einstaklinga og sá sem er metinn hæfastur hljóti starfið.“

Helga minnir jafnframt á að Steingrímur J. Sigfússon fjármálaráðherra hafi, þegar hann var í stjórnarandstöðu, gagnrýnt umrædda grein og kallað hana laumufarþega í frumvarpi um lög um Stjórnarráð.

Helga segir að á þeim tíma hafi BSRB talið að verið væri að stíga fyrsta skrefið í þeirri þróun að ráða almennt án auglýsinga.

„Og það virðist einmitt vera að gerast núna.“- þj