Bjóða upp á ókeypis lögfræðiþjónustu - ómetanleg reynsla fyrir nemana

„Þetta er ómetanleg reynsla fyrir okkur og svo auðvitað vel metin samfélagsþjónusta,“ segir Sigríður Marta Harðardóttir, meistaranemi í lögfræði, en nemendafélag Háskólans í Reykjavík, Lögrétta, býður upp á ókeypis lögfræðiþjónustu. Sigríður er framkvæmdastjóri þjónustunnar, sem er einfaldlega kölluð lögfróður.

Þannig geta þeir, sem þurfa að sækja sér slíka þjónustu, bæði hringt í nemendafélagið, sent tölvupóst eða komið á staðinn, vanti þeim aðstoð lögfræðinga.

„Við útskýrum réttarstöðuna fyrir fólki og gætum þess að vísa þeim áfram þannig þau stoppi ekki bara hjá okkur,“ segir Sigríður Marta. Þá heimsækja nemarnir einnig framhaldsskólana þar sem nemendur eru meðal annars fræddir um vinnurétt og hættur smálána.

Háskólinn í Reykjavík hefur boðið upp á ókeypis lögfræðiþjónustu síðan árið 2007. Aðspurð segir Sigríður að fyrirspurnirnar hafi breyst töluvert eftir hrun. Áður hafi einstaklingar oft vilja forvitnast um hjúskaparrétt og lagalegar hliðar slita á sambúð.

„Í ár er mikið af fyrirspurnum frá fólki, sem hefur til að mynda fengið synjun á 110 prósent leiðinni, og vill kæra þá ákvörðun, og fleiru því tengdu,“ segir Sigríður.

Auk þess að aðstoða almenning fara nemendur í Kvennaathvarfið þar sem þeir veita þeim, sem þar dvelja, endurgjaldslausa ráðgjöf.

Lögfróður er staðsettur í aðalinngangi Háskólans í Reykjavík en hægt er að mæta á staðinn, hringja í s. 777-8409 eða senda tölvupóst á logfrodur@hr.is