Lögregla leitar að breiðleitum þjóf með gisnar tennur

Um klukkan sjö í gærmorgun var tilkynnt um innbrot í Gesthús á Selfossi. Vitni sá til ungs manns koma út úr húsinu og fara í burtu á reiðhjóli. Í ljós kom að búið var að taka nokkuð magn af áfengi sem fannst skömmu síðar falið skammt frá húsinu.

Innbrotsþjófurinn er ófundinn. Hann er talinn vera um tvítugt, 170 sm á hæð, breiðleitur, sennilega burstaklipptur og með gisnar tennur, að því er fram kemur í tilkynningu frá lögreglu. Maðurinn var í grárri hettupeysu með mynstri og í gallabuxum. Reiðhjólið sem maðurinn fór á var ljósgrátt. Lögregla biður þá sem veitt geta upplýsingar um málið að hafa samband í síma 480-1010.