Marta ætlar að spila með Þórunni og félögum í Santos

Besta knattspyrnukona heims, hin brasilíska Marta, ætlar að nýta fríið í bandarísku atvinnumannadeildinni til þess að koma heim til Brasilíu og spila með Santos-liðinu í Copa Libertadores.

Íslenska landsliðskonan Þórunn Helga Jónsdóttir hefur spilað með Santos síðasta árið við mjög góðan orðstýr og nú fær hún tækifæri til að spila með bestu knattspyrnukonu heims.

Marta Vieira da Silva eins og hún heitir fullu nafni spilar með Los Angeles Sun í bandarísku atvinnumannadeildinni en henni lýkur 22. ágúst næstkomandi og hefst ekki aftur fyrr en næsta vor. Marta mun því einnig spila með Santos þegar liðið reynir að verja bikarmeistaratitilinn sem Þórunn vann með liðinu í desember.

Marta er 23 ára gömul og hefur skorað 8 mörk í 14 leikjum með Los Angeles Sun í bandarísku atvinnumannadeildinni. Hún lék áður með Umeå IK í Svíþjóð þar sem hún skoraði 111 mörk í 103 leikjum frá 2004 til 2008.

Marta hefur leikið 45 landsleiki með Brasilíu og skorað í þeim 47 mörk. Hún hefur verið kosin besta knattspyrnukona heims undanfarin þrjú ár.