Tekist á um tvær tillögur

Sautján atkvæðabærir flokksráðsmenn Vinstri grænna leggja til á flokksráðsfundi sem hófst síðdegis, að aðildarviðræðum Íslands við Evrópusambandið verði slitið nú þegar. Í annarri ályktun sem fleiri atkvæðabærir flokksmenn flytja, er lýst yfir stuðningi við ríkisstjórnina og þar með að viðræðurnar haldi áfram.

Í fyrri tillögunni er lagt til að yfirstandandi aðlögunarferli að Evrópusambandinu verði stöðvað, rýnivinnu verði hætt og þeim lokið fyrir mars á næsta ári. Í tillögu sem 40 atkvæðabærir menn skrifa undir er stefna flokksins ítrekuð. Ljúka eigi viðræðuferlinu og leggja niðurstöðuna fyrir almenning í þjóðaratkvæðagreiðslu. Um þessar tillögur verður rætt á fundinum í kvöld.

Steingrímur J. Sigfússon, formaður VG, sagði að menn þyrftu að gera það upp við sig hvort þeir ætluðu að láta Evrópumálin í vaxandi mæli ná völdum á umræðunni. „Við munum hér sum inni í salnum tvenna tímana og vitum hvað það er sem er hættulegast af öllu í félags- og hugsjónastarfi af þessu tagi. Við vitum það nákvæmlega og við skulum ekki sleppa þeim fjanda, sundurlyndisfjanda, lausum."

Þá sagði Steingrímur: „Um Evrópumálin sem menn hafa reynt að draga upp þá mynd að yrði eitt til umræðu hér á þessum fundi og blóðug átök um það mál þá vil ég bara segja þetta. Munum að það er ekki ágreiningur um grundvallarstefnu flokksins í því máli. Berum umræðuna ekki fram undir þeim formerkjum. En það hafa verið miklar deilur um málsmeðferð, um þá stöðu sem uppi er, hvað sé rétt að gera í því og hvernig við eigum að taka á þeim málum. Það er skiljanlegt vegna þess að þessi vegferð okkar er erfið."