Hæstu menn landsbyggðar

Akureyringar eru atkvæðamiklir þegar rýnt er í lista yfir þá sem greiða hæstu gjöldin á landsbyggðinni. Sá sem greiðir mest kemur þó úr Vestmannaeyjum. Mikill munur er á efstu mönnum á höfuðborgarsvæðinu og landsbyggðinni. Gjaldahæsti maður landsbyggðarinnar er Gunnar Jónsson úr Vestmannaeyjum. Hann þarf að greiða rúmar 42 milljónir í opinber gjöld. Þá kemur Páll Stefánsson í Snæfellsbæ með rúmar 33 milljónir. Næstir á landsbyggðarlistanum eru tveir skipstjórar og bræður frá Höfn; Örn Þór Þorbjörnsson og Ágúst Hilmar Þorbjörnsson með rúma 31 milljón hvor. Athygli vekur að níu af 10 hæstu gjaldendum á Austurlandi koma úr tveimur sveitarfélögum; Höfn og Fjarðabyggð. Næst koma tveir Vestmannaeyingar; Guðjón Ragnar Rögnvaldsson og Leifur Ársælsson, báðir með tæpar 30 milljónir króna. Nokkurt bil er í næsta mann sem kemur frá Vesturlandi, Ólafur Ólafsson. Þá koma þrír Sunnlendingar; Guðmundur A Birgisson, Gunnar A. Jóhannsson og Guðmundur Jónsson. Þeir eru allir með hálfan annan tug milljóna í gjöld. Og þá kemur að þætti Akureyringa sem raða sér í næstu fimm sætin; allir með 13 til 14 milljónir. Það eru þeir bræður Birgir, Vilhelm og Skúli Ágústssynir, oft kallaðir Kennedýbræður. Þar inn á milli troða sér útgerðarmaðurinn Þorsteinn Már Baldvinsson og Jóhannes úr Bónus er þarna líka, ekki þó hálfdrættingur á við son sinn eins og við sáum áðan. Enn höfum við engan séð frá Vestfjörðum og Norðurlandi vestra. Hæstu menn þar teljast ekki háir miðað við aðra landsfjórðunga. Á Vestfjörðum er Leif Halldórsson, útgerðarmaður á Patreksfirði hæstur með tæpar 10 milljónir og á Norðurlandi vestra er Gísli Ólafsson, læknir á Blönduósi á toppnum með rúmar 7 milljónir króna.