Almenn lækkun lyfja vænlegri

Almenn lækkun á heildsöluverði er vænlegri kostur en reglugerð um viðmiðunarverð lyfja segir fulltrúi lyfjahóps Félags íslenskra stórkaupmanna. Hann segir lyfjaframleiðendur ánægða með samning um lækkun lyfjaverðs, sem undirritaður var í gær. Eins og fram kom í fréttum Stöðvar 2 í gær hafa Heilbrigðisráðuneytið og fulltrúar lyfjaframleiðenda innan félags íslenskra stórkaupmanna náð samkomulagi um lækkun lyfjaverðs hér á landi næstu 2 árin. Reglugerð um viðmiðunarverð lyfja, sem taka átti gildi þann 1. maí síðstliðinn, var í vor frestað til 1.ágúst og þá hófu hlutaðeigandi aðilar vinnu við að finna aðra lausn á málinu. Guðbjörg Alfreðsdóttir, fulltrúi lyfjahóps FÍS (Félags íslenskra stórkaupmanna) segir þá lendingu sem nú hefur náðst mun betri lausn heldur en reglugerð um viðmiðunarverð, sem að hennar mati hefði komið sér illa fyrir marga sjúklinga og valdið mismunun. Niðurstaðan hafi því orðið sú að lækka fremur heildöluverð lyfja hér á landi.