Yfirheyrslur standa enn yfir

Yfirheyrslum yfir Hákoni Eydal, sem hefur játað að hafa banað Sri Rahmawati í byrjun þessa mánaðar, var framhaldið í dag. Deilur Hákonar og Sri um forræði yfir dóttur þeirra eru taldar meðal ástæðna fyrir morðinu. Ómar Smári Ármannsson, aðstoðaryfirlögregluþjónn sagði í samtali við fréttastofu að enn væru lausir endar í rannsókn málsins. Í tilkynningu lögreglunnar í gær sagði að ástæða morðsins væri bæði langvarandi og skyndileg. Þegar fréttamaður bað um skýringar á þessu orðalagi hjá Ómari og sagði það vekja um fleiri spurningar en svör, sagði Ómar að það væri einmitt tilgangurinn, og vildi ekki skýra það frekar. Hákon og Sri eiga saman unga dóttur. Fréttastofa hefur heimildir fyrir því að fram hafi komið við yfirheyrslur yfir Hákoni að deilur um forræði yfir henni eigi þátt í þessum harmleik. Ómar Smári segir að Hákon hafi fyrir nokkrum árum unnið hjá póstinum í Svíþjóð og að það útskýri sænska póstpokann sem Hákon segist hafa sett líkið af Sri í áður en hann varpaði því í sjóinn við Hofsvík á Kjalarnesi, en Hákon heldur því fram við yfirheyrslur að staðurinn hafi verið valinn af handahófi. Ómar segir svona póstpoka sjaldgæfa hérlendis og því sé ástæða fyrir fólk að láta vita ef það sjái slíkan poka. Hann segir að Hákon verði áfram í yfirheyrslum yfir helgina, jafnframt því sem haldið verður áfram að geðrannsaka hann. Leitinni að líki Sri hefur verið frestað til sunnudags eða mánudags. Þá verður sett út rekald til að kanna strauma á svæðinu, en þá verða sjávarföll svipuð og þegar líki Sri var varpað í sjóinn.