Höfuðborgarbúar flýja atvinnuleysi

Fleiri fluttu frá höfuðborgarsvæðinu en til þess á þriðja ársfjórðungi þessa árs en leita þarf langt aftur til að finna sambærilega þróun. Stefán Ólafsson prófessor segir að meira atvinnuleysi á suðvesturhorninu en á landsbyggðinni sé líklegasta skýringin á þessari þróun.. Hagstofa Íslands birti á dögunum tölur um búferlaflutninga á landinu frá júlí til september. Aðeins tvö landsvæði voru með fleira aðkomufólk en brottflutta: Austurland og Suðurland. Mesta athygli vekur að fleiri fluttu frá höfuðborgarsvæðinu en til þess, eða 88 manns. Stefán Ólafsson, prófessor í félagsfræði við Háskóla Íslands, segir þetta mjög óvenjulegt í ljósi þróunarinnar síðustu tuttugu árin en á hitt beri að líta að aðeins er um einn ársfjórðung að ræða. "Athyglisverðasta spurningin hlýtur að vera sú hvort þetta megi rekja til vaxandi atvinnuleysis á höfuðborgarsvæðinu. Það er nú þannig að undanfarin misseri hefur atvinnuleysið verið umtalsvert hærra í höfuðborginni heldur en úti á landi. Ég held að það geti vel verið að áhrifin af því séu að koma í ljós, þótt þau séu ekki enn mjög mikil," segir hann. Samkvæmt upplýsingum Vinnumálastofnunar voru 3,1 prósent íbúa höfuðborgarsvæðisins atvinnulaus í september á meðan 1,9 prósent landsbyggðarfólks var án vinnu. Virkjanaframkvæmdir á Austurlandi geta haft sitt að segja. Enda þótt útlendingar séu í stærstum hluta þeirra sem vinna við Kárahnjúkavirkjun telur Stefán að framkvæmdirnar dragi úr brottflutningi fólks úr landsfjórðungnum. Stefán segir að tengsl milli afkomu og búsetu séu gamalkunn. "Það er nú þannig með búferlaflutninga að þeir eru mjög næmir á lífskjör fólks og afkomu hvort sem um er að ræða flutninga á milli landa eða innanlands," segir hann og útilokar ekki að áframhald verði á þessari þróun jafnist ekki atvinnuleysi á milli höfuðborgar og landsbyggðar.