Jarlinum skipt út

Eimskipafélag Íslands ehf. hefur gert samning um smíði á færanlegum hafnarkrana og verður kraninn sá stærsti sinnar tegundar hér á landi. Í fréttatilkynningu frá félaginu segir að fjárfestingin sé liður í að auka framleiðni skipaafgreiðslu félagsins í Sundahöfn og bæta þjónustu við viðskiptavini. Nýi hafnarkraninn verður smíðaður í Þýskalandi og kemur í stað eldri krana sem seldur verður úr landi. Kraninn mun hafa 110 tonna lyftigetu og verður 416 tonn að þyngd, 32 metra hár og með 50 metra langa bómu. Til samanburðar má nefna að lyftigeta þess krana sem sá nýi leysir af hólmi er um 80 tonn. Eimskip rekur nú tvo stóra gámakrana í Sundahöfn, Jakann og Jarlinn, sem lyfta samtals um 100.000 gámum á ári. Jakinn kom til landsins árið 1984 en Jarlinn árið 1996 og kemur nýi kraninn í stað hins síðarnefnda.