Sveitastjóra sagt upp störfum

Sveitarstjórn Skeiða- og Gnúpverjahrepps gekk fyrirvaralaust frá starfslokum Sigurðar Jónssonar, sveitarstjóra, í gær. Í Sunnlenska fréttablaðinu kemur fram að skrif sveitarstjórans á bloggsíðu sína og ofreiknuð laun höfðu áhrif á brotthvarfið.

Fyrir skemmstu uppgötvaðist að Sigurður Jónsson hefði, frá því að hann tók við embættinu árið 2006, reiknað sér laun útfrá rangri launavísitölu. Hann fékk ofgreiddar milljónir vegna skekkjunnar. „Ég gerði mistök við túlkun á ráðningarsamningi. Ég mun bæta fyrir þau. Það er engin ágreiningur um málið," segir Sigurður í samtali við Sunnlenska.

Sigurður er einn vinsælasti Moggabloggari landsins og umdeildur sem slíkur. „Það er rétt; hreppsnefndarmenn voru ekki á eitt sáttir við að ég skyldi blogga. Þar að auki hef ég þurft að hreinsa síðuna af persónulegu níði eftir sveitunga mína," segir Sigurður og ætlar ekki að hætta að blogga.