Gætið að grillinu og takið tillit til vinds þegar bílhurðin er opnuð

Í ljósi þess að spáð er stormi í nótt og í fyrramálið vill tryggingafélagið VÍS hvetja fólk til þess að taka fullt tillit til veðursins. Mesta vindhæðin er á þeim tíma þegar einstaklingar eru á leið til vinnu og skóla í fyrramálið.

Þannig eru foreldrar hvattir til þess að fylgja börnum í skóla, taka tillit til vinds þegar bílhurðir eru opnaðar þar sem hætta er á að þær fjúki upp eða skelli á fólk og hafi í huga, sér í lagi við háar byggingar, að vindur getur feykt fólki til eins og raunin varð í fárvirðrinu sem gekk hér yfir síðustu helgi.

Jafnframt er mikilvægt að huga að lausum munum sem eru utandyra. Undanfarið hefur norðanátt verið ríkjandi í þeim óveðrum sem gengið hafa yfir og margir því sett grill og annað lauslegt í skjól hlémegin við hús sín út frá norðanáttinni. Nú er spáð SA-stormi og mikilvægt að fólk endurmeti hvort lausamunir séu í skjóli út frá vindátt úr suð-austri.

Spáð SA-stormi sunnanlands og vestan í nótt og fyrramálið og síðar einnig annars á landinu. Á Höfuðborgarsvæðinu, Suðurnesjum og víðar um suðvestanvert landið er útlit fyrir að vindurinn verði í hámarki um það bil frá kl. 6 til kl. 9.

Veðurhæðin verður allt að 25 m/s og enn hvassara í hviðum, svo sem í efri byggðum Reykjavíkur og Kópavogs, Vallahverfinu og Áslandi í Hafnarfirði sem og á Ásbrú í Reykjanesbæ.