Lenti með hendi í sláttuvél

Kona í Garðabæ lenti með hendi í garðsláttuvél í vikunni og missti framan af þremur fingrum. Lögregla og sjúkralið voru kölluð á vettvang og var konan í kjölfarið flutt á slysadeild. Átta þjófnaðarmál voru kærð í umdæmi lögreglunnar á Álftanesi, í Garðabæ og Hafnarfirði þar sem m.a. var brotist inn í Flensborgarskóla, bifreið í suðurbæ Hafnarfjarðar og farsíma stolið frá starfsmanni á bensínstöð þar í bæ. Á miðvikudag var maður handtekinn, grunaður um aðild að þessum málum, og teljast þau upplýst. Síðasta vika var annars friðsöm og róleg hjá lögreglunni í þessu umdæmi. Mun færri afskipti voru höfð af ökumönnum vegna umferðarlagabrota en í síðustu viku enda umferð minni sökum sumarleyfa. Sex umferðaróhöpp voru tilkynnt til lögreglunnar og voru þau öll slysalaus. Víkurfréttir greina frá.