Hælisleitandi í hungurverkfalli: Mótmælt í Reykjanesbæ

Boðað hefur verið til mótmæla fyrir utan gistiheimilið Fit í Reykjanesbæ í dag klukkan ellefu til þess að vekja athygli á málum Mansri Hichem, sem er á 19. degi hungurverkfalls. Í tilkynningu frá skipuleggjendum segir að ástæða mótmælanna sé viðbragðsleysi stjórnvalda við aðgerðum mannsins auk þess sem stjórnvöld eru sökuð um að hafa sýnt almennt skeytingarleysi um mannréttindi og velferð flóttamanna sem hingað hafa leitað.

„Útlendingastofnun hefur með starfsemi sinni síðustu mánuði, og líklega síðustu ár, gerst sek um brot á hinum ýmsu landslögum, mannréttindasáttmálum sem bundnir eru í lög, sem og alþjóðlegum samningum sem Ísland er aðili að, t.a.m. Dyflinnarreglugerðinni, þeirri sömu og Útlendingastofnun hefur notað sem útskýringu á og afsökun fyrir illri meðferð flóttamanna. Ekkert í reglugerðinni kveður þó á um slíka meðferð og fram kemur í formála að henni að tilgangur hennar er að sporna við ábyrgðar- og skeytingarleysi viðkomandi ríkja í garð flóttamanna, og stuðla að því að þeir eins og aðrir menn fái notið mannréttinda sinna," segir í tilkynningunni.

„Tími og rúm eru óaðskiljanleg, og án staðar í heiminum hefur tímalengd lífa þessara manna ekki nokkra þýðingu," segir ennfremur. „Mansri Hichem hefur verið látinn bíða á Íslandi í tvö ár, án tækifæris til þess að taka þátt í samfélagi manna, án tækifæris til að vinna eða halda áfram lífi sínu. Í tvö ár hefur hann verið látinn bíða í örvæntingarfullri óvissu frá degi til dags um hvort nú komi röðin að honum, að nú verði hann sendur burt, á meðan félagar hans á gistiheimilinu hverfa út í óvissuna einn á fætur öðrum, teknir höndum af lögreglunni, brottreknir og sjást ei meir."

„Eftir tvær vikur án matar byrja innri líffæri að skemmast, endanlega eyðileggjast. Eftir þrjár vikur er ástandið orðið lífshættulegt. Mansri er að nálgast þrjár vikur, hefur mikla verki í hjarta og nýrum og er hættur að geta staðið uppréttur. Við berum ábyrgð á þessum manni, líka skv. Dyflinnarreglugerðinni en í henni segir að ef ríki telur ábyrgð liggja hjá öðru ríki, skuli krafan um það að vera lögð fram innan þriggja mánaða frá því að umsókn um hæli er lögð fram. Við berum ábyrgð á því að mál Mansri fái sanngjarna umfjöllun og við berum ábyrgð á því að hann fái notið mannréttinda sinna, hvernig sem á það er litið," segir einnig í tilkynningunni sem send var öllum þingmönnum landsins. Bréfinu lýkur á eftirfarandi orðum:

„Samfélagsleg ábyrgð liggur hjá hverju okkar, en þú ágæti þingmaður berð persónulega meiri ábyrgð, kosinn til að gæta hagsmuna okkar og kosinn til þess að ganga í forsvari fyrir þessa þjóð. Ég skora á þig að bregðast við þeirri ábyrgð af mannúð og manngæsku, og gerast ekki ábyrgur fyrir dauða Mansri Hichem."