Spyr hvort Össur fjármagni flokk Browns

„Nú verður spennandi að sjá hvaða silkihanskameðferð breski sendiherrann hér á landi fær vegna rangra og meiðandi ummæla Browns um Ísland í breska þinginu í vikunni," segir Sigríður Ásthildur Andersen, varaþingmaður Sjálfstæðisflokksins á vefsíðu sinni.

Gordon Brown sagði í breska þinginu í síðustu viku að Bretar væru í viðræðum við Alþjóðagjaldeyrissjóðinn um greiðslur Íslendinga til Icesave. Þá bar á misskilningi í orðum breska forsætisráðherrans hvað varðar ábyrgð Íslendinga á bönkunum. Brown taldi að Íslendingar bæru ábyrgð á inneignum Christie spítalans í Singer & Friedlander bankanum, en bankinn laut eftirliti breska fjármálaeftirlitsins.

Sigríður segist vona að það hafi engin áhrif á samskipti Össurar Skarphéðinssonar utanríkisráðherra við breska sendiherrann að Össur hafi verið félagi í Breska verkamannaflokknum til lífstíðar. „Össur lýsti því yfir árið 2007 að hann greiddi samviskusamlega félagsgjöld í breska Verkamannaflokkinn og hefði gert frá námsárunum. Ætli hann taki enn þátt í að fjármagna flokk Gordons Browns?," spyr Sigríður.

Össur kallaði sendiráðsfulltrúa í breska sendiráðinu á sinn fund síðastliðinn föstudag vegna málsins. Þá hefur sendiherra Íslendinga í London rætt málin við fulltrúa breskra stjórnvalda í Downingstræti.