Fimm konur með barn í fangelsi

Fanta Silla, sem fékk fimm ára dóm fyrir e-töflusmygl, gæti orðið sjötta konan sem tekur barn sitt með sér í fangelsi hér á landi síðan Kvennafangelsið í Kópavogi var tekið í notkun fyrir fimmtán árum. Börnin geta búið þar hjá mæðrum sínum til tveggja ára aldurs. Fanta Sillah, barnshafandi kona frá Síerra Leóne, var dæmd í fimm ára fangelsi í Héraðsdómi Reykjaness í gær en hún var tekin í Leifsstöð með um 5 þúsund e-töflur í bakpoka. Sillah er nú á sjúkrahúsi vegna óþæginda í meðgöngu og þarf hugsanlega að dveljast þar fram að fæðingu barnsins í október. Fyrir á hún ungt barn sem er í umsjá ættingja í Síerra Leóne og fimm ára barn sem er í umsjá hollenskra barnaverndaryfirvalda. Líklegt er að hún afpláni refsingu sína í Kvennafangelsinu í Kópavogi þó til greina komi að hún taki út refsingu sína í Hollandi. Í fangelsinu er allt til reiðu til að taka á móti Sillah og barninu hennar. Sigríður Jónasdóttir varðstjóri segir allan búnað, s.s. barnarúm og skiptiborð, vera í fangelsinu enda hafi fimm konur afplánað dóma í fangelsinu með börn frá því það tók til starfa árið 1989. Börnin voru allt frá því að vera nýfædd og upp að tveggja ára aldri. Þrjár af þessum konum fæddu börn sín meðan þær voru í afplánun. Ekki er talið æskilegt að börn dvelji í fangelsum lengur en til tveggja ára aldurs að hámarki, en hvert tilfelli er metið fyrir sig. Myndin er af Kvennafangelsinu í Kópavogi.