Umferðarljósum stolið í annað sinn

Bíræfnir þjófar stálu um miðja síðustu viku tveimur umferðarljósum af gatnamótum Sæbrautar og Holtavegar. Ljósahausarnir sem stolið var eru nokkru minni en hefðbundin ljós og voru þeir festir á miðja staura vestanmegin gatnamóta fyrir umferð frá Holtavegi. Í tilkynningu frá Reykjavíkurborg segir að búið sé að kæra þjófnaðinn til lögreglu og eru þeir sem hafa ábendingar beðnir um að láta lögreglu vita.

Þetta er í annað sinn sem ljósum á þessum stað er stolið, en öðrum hausnum var stolið í nóvember síðastliðnum, en hinn losaður. Ljósunum var þá skilað og urðu engir eftirmálar. Dagbjartur Sigurbrandsson, verkefnissstjóri, segir að í kjölfarið hafi verið gengið betur frá festingum, en það hafi því miður ekki dugað til, því nú voru ljósin brotin af. Þessi nýja tegund ljósa var sett upp síðastliðið sumar þegar breytingar voru gerðar á ljósabúnaði gatnamótanna.

„Vonast er til að ljósahausarnir skili sér og mögulegt verði að setja þá upp að nýju. Ný ljós kosta líklega um hálfa milljón króna, en þau þarf að sérpanta og getur því liðið einhver tími þar til hægt verður að laga ljósin," segir í tilkynningu frá borginni.

Þá segir að ljósin sem eru efst á staurnum virki enn og eru þau á sömu stillingu og ljósin sem tekin voru. „Ökumenn bíla sem stöðva við gatnamótin eiga erfiðara með að fylgjast með ljósunum, sem er bagalegt því á þessum gatnamótum er umferðin þung. Vegfarendur eru beðnir um að sýna aðgát meðan þetta ástand varir."