Þrír sækjast eftir þingflokksformennsku

Þrír þingmenn munu sækjast eftir að gegna þingflokksformennsku Samfylkingarinnar samkvæmt heimildum Vísis. Þingflokksfundur hefst klukkan hálf tvö í dag og verður niður á þingi.

Þeir sem sækjast eftir formennskunni eru Helgi Hjörvar, Steinunn Valdís Óskarsdóttir, sem nú er varaþingflokksformaður. Og svo Björgvin G. Sigurðsson fyrrum viðskiptaráðherra og fyrsti þingmaður Suðurlands.

Mikil spenna ríkir innan flokksins vegna málsins samkvæmt heimildum Vísis. Allir vilja þingmennirnir treysta stöðu sína innan þingflokks en bæði Björgvin og Steinunn Valdís voru harðlega gagnrýnd fyrir kosningar.

Steinunn vegna styrkjamálsins og Björgvin fyrir að vera viðskiptaráðherra þegar bankahrunið varð. Hann sagði síðan af sér sem ráðherra í janúar síðastliðnum.

Talið er að kosið verði á milli þingmannanna þriggja og atkvæðin látin ráða niðustöðunni. Að öllu jöfnu er einn þingflokksformaður tilnefndur og hann svo kosinn.

Af öðrum fregnum innan þingflokks Samfylkingarinnar þá heyrist að Guðbjartur Hannesson, sem var forseti þingsins, muni gegna formennsku í fjárlaganefnd. Áður gegndi Gunnar Svavarsson, fráfarandi þingmaður, formennsku fjárlaganefndar.

Ásta Ragnheiður Jóhannsdóttir verður þingforseti eins og áður hefur verið greint frá.